Ўзбекистон ва Япония алоқалари янги даражага кўтарилди

Ўзбекистон ва Япония муносабатлари кенгайтирилган стратегик шериклик даражасига кўтарилди. Бу ҳақда бугун, 20 декабрь куни “Кантэй” қароргоҳида ўтган Ўзбекистон Республикаси Президенти Шавкат Мирзиёев ва Япония Бош вазири Санаэ Такаичининг музокараларида маълум қилинди.

Бош вазир Такаичи Президент Мирзиёевнинг сўнгги олти йил ичида Японияга қилган илк ташрифини қутлаб, икки давлат муносабатлари “келажак авлодлар учун кенгайтирилган стратегик шериклик” даражасига кўтарилганини таъкидлади. У халқаро ҳуқуқ устуворлигига асосланган эркин ва очиқ халқаро тартибни сақлаш ва мустаҳкамлашда Ўзбекистон билан стратегик шерик сифатида муносабатларни янада ривожлантириш истагини билдирди.

Президент Мирзиёев Япониянинг Ўзбекистонда модернизация ва инсон ресурсларини ривожлантиришга қаратилган кўп йиллик ёрдами учун чуқур миннатдорлик билдирди, шунингдек, япон компанияларининг Ўзбекистондаги фаол иштирокини олқишлаб, бизнес муҳитини яхшилаш каби чоралар орқали иқтисодий муносабатларни янада ривожлантириш истагини билдирди.

Якунда Ўзбекистон Президенти ва Япония Бош вазири Келгуси авлодлар учун кенгайтирилган стратегик шериклик тўғрисидаги қўшма баёнотни имзоладилар. Ушбу ҳужжат, шубҳасиз, муносабатларни янги босқичга кўтариши ва кўп қиррали ҳамкорликни кенгайтириш учун кенг имкониятлар очиши таъкидланди.

Ташриф доирасида таълим, соғлиқни сақлаш, экология, сув ресурслари, транспорт, шаҳарсозлик, туризм, қишлоқ хўжалиги, табиий офатлар хавфини камайтириш соҳаларида салмоқли келишувлар тўплами қабул қилинди. Ушбу ҳужжатларни алмашиш маросими бўлиб ўтди.