Ўзбекистон FIFA рейтингида 10 поғона пастлади

Ўзбекистон миллий терма жамоаси Жаҳон чемпионатидаги натижаларидан сўнг FIFA’нинг янгиланган жаҳон рейтингида 23,11 очко йўқотди ва бир йўла 10 поғонага пастлади. Бу ҳақда FIFA’нинг онлайн рейтингида кўриш мумкин.

Жаҳон чемпионатидаги муваффақиятсиз иштирокдан сўнг Ўзбекистоннинг рейтинги сезиларли равишда пасайди. Терма жамоа гуруҳ босқичида учала учрашувда ҳам мағлубиятга учраб, бирорта ҳам очко тўплай олмади. Бу эса FIFA рейтингида ҳам ўз таъсирини кўрсатди.

Янгиланган рейтингга кўра, Ўзбекистон 23,11 рейтинг очкосидан маҳрум бўлиб, 1409,73 очко билан аввалги ўрнига нисбатан 10 поғона пастлади ва 60-поғонадан жой олди. Натижада Ўзбекистон терма жамоаси Осиё жамоалари ичида 7-ўринга тушиб қолди. Саудия Арабистони ва Қатар терма жамоалари рейтингда Ўзбекистондан ўзиб кетди.

Ҳозирда FIFA рейтингида Аргентина терма жамоаси етакчилик қилмоқда, Франция терма жамоаси иккинчи, Испания эса учинчи ўринни эгаллаб турибди.

Эслатиб ўтамиз, Ўзбекистон миллий терма жамоаси 2026 йилги Жаҳон чемпионати “К” гуруҳида Колумбияга 1:3, Португалияга 0:5 ва Конго Демократик Республикасига 1:3 ҳисобида мағлуб бўлиб, мусобақани гуруҳ босқичидаёқ якунлаган эди.

Маълумот учун, FIFA рейтинги расман жорий йилнинг 20 июль куни Жаҳон чемпионати якунлагандан кейин янгиланади.