Акбар Жўраев 4 карра жаҳон чемпиони бўлди

Бугун, 6 ноябрь куни Ўзбекистон оғир атлетика терма жамоаси аъзоси Акбар Жўраев Хитойнинг Нинбо шаҳрида якунланаётган Жаҳон чемпионатида олтин медални қўлга киритди. Жўраев 110 кг вазн тоифасида иштирок этиб, тўртинчи бор жаҳон чемпиони бўлди.

Силтаб кўтариш машқида Акбар Жўраев 234 кг оғирликдаги штангани муваффақиятли кўтарди.

Эътиборлиси, Акбар Жўраев олдинроқ даст кўтариш машқида 198 кг натижа қайд этиб, ўзининг жаҳон рекордини янгилаганди.

Шу тариқа, икки кураш якунларига кўра, Жўраев 432 кг натижа билан олтин медални қўлга киритди ва ушбу йўналишда ҳам янги жаҳон рекордини ўрнатди.

Мазкур жаҳон чемпионати Лос-Анжелес-2028 ёзги Олимпия ўйинлари учун рейтинг очколарини тақдим этиши билан ҳам аҳамиятли. Акбар Жўраев иккита жаҳон рекордини янгилаш орқали қўшимча бонус очколарига ҳам эга бўлди.

Маълумот учун, Акбар Жўраев Токио-2020 Олимпия ўйинларида 109 кг вазн тоифасида олтин медални қўлга киритган. Шунингдек, Париж-2024 Олимпия ўйинларида кумуш медалга сазовор бўлган. Бундан ташқари, Жўраев 2025 йил 10 октябрь куни Норвегиянинг Фёрде шаҳрида ўтказилган оғир атлетика бўйича жаҳон чемпионатида учта олтин медални қўлга киритган эди.