Ўзбекистон делегацияси Лео ХIV’нинг тахтга чиқиш маросимида қатнашди

north_east

Лео XIV Ватикан тахтига ўтирди (фоторепортаж)

Кеча, 18 май куни Ватиканда 267-Рим епископи Лео XIV хизматининг расмий бошланиши (тахтга ўтириши) муносабати билан тантанали маросим бўлиб ўтди ва унда Ўзбекистон делегацияси ҳам иштирок этди. Бу ҳақда “Дунё” ахборот агентлиги хабар берди.

Қайд этилишича, тадбирда қатнашиш учун бутун дунё бўйлаб жами 250 минг киши Ватикан майдони ва унинг атрофига йиғилган. Унда Олий Мажлис Қонунчилик палатаси спикери Нуриддин Исмоилов Ўзбекистон томонидан расмий вакил сифатида қатнашган. 

Маросимнинг расмий қисми якунланганидан сўнг Қонунчилик палатаси спикери Нуриддин Исмоилов янги сайланган Рим Папасини табриклаб, Ўзбекистон Президенти Шавкат Мирзиёевнинг илиқ саломини етказган.

“Ўз навбатида, янги Рим Папаси Ўзбекистон раҳбарияти ва халқига чуқур миннатдорлик билдирди”, дейилади  хабарда.

Маросимда 156 та хорижий мамлакат, қироллик уйлари ва диний конфессиялардан делегациялар вакиллари қатнашган.

Эслатиб ўтамиз, аввалроқ Рим папаси Франциск (Хорхе Марио Берголо) узоқ давом этган касалликдан сўнг жорий йилнинг 21 апрелда вафот этган эди. Унинг дафн маросимида Ўзбекистондан Олий Мажлис Сенати Раисининг биринчи ўринбосари Содиқ Сафоев иштирок этди.

7 май куни Ватиканда Конклав очилди – 133 кардинал янги Рим папасини сайлаш учун Сикстин капелласига йиғилишди. Кардиналлар Рим-католик черковининг янги бошлиғини сайлади, у америкалик Роберт Прево бўлди.