Туркиядаги НАТОга қарши намойишларда юзлаб коммунистик партия вакиллари ушланди

Туркиянинг пойтахти Анқара шаҳрида бўлиб ўтадиган НАТО саммити арафасида ўтказилган альянсга қарши намойишларда 100 дан ортиқ киши қўлга олинди. Бу ҳақда Туркия Коммунистик партияси (TKP) хабар қилди.

Партия 7-8 июль кунлари Туркия пойтахтида бўлиб ўтиши режалаштирилган НАТО саммити олдидан 5 июль куни Анқарада НАТОга қарши оммавий митинг ўтказишга чақирган. Улар ўзининг дастлабки мурожаатида НАТОни ташкил этилганидан бери бутун дунё халқларига уруш ва вайронагарчилик келтирган ташкилот сифатида таърифлаган ва саммит Туркияни НАТОнинг ҳарбий ва сиёсий кун тартибига янада интеграция қилишини таъкидлаган. 

“НАТО ўлим ва шармандалик демакдир. Ҳаёт, мустақиллик ва социализм абадий бўлсин”, деган TKP фуқароларни Анқарадаги Тандоған майдонида тўпланишга чақириб.

Туркия Коммунистик партияси баёнотига кўра, Анқара марказидаги Қизилай майдонида ўтказилган юриш чоғида партиянинг 100 дан ортиқ аъзоси, жумладан раҳбар ходимлари ҳам қўлга олинган. Тармоқларда тарқалган видеоларда байроқ кўтарган намойишчилар “Қотил НАТО, мамлакатдан чиқ!”, “НАТОга йўл йўқ!” каби шиорларни айтгани акс этган. Намойишни тарқатиш учун полиция кўздан ёш чиқарувчи газдан фойдаланган.

Қайд этилишича, Истанбулда ҳам Коммунистик партия ташкил этган алоҳида акцияда юзлаб одамлар Таксим майдонидан Долмабоғчагача юриш қилган. Шунингдек, Кадикёй туманида сўл қанот гуруҳлари томонидан яна икки намойиш ўтказилган. Истанбулда полиция кучайтирилган тартибда хизмат қилган бўлса-да, тўқнашувлар қайд этилмаган.

“Бугун Туркиянинг турли ҳудудларида НАТОга қарши норозилик билдириш учун йиғилдик. Биз Анқарани НАТО тарафдорларига топширмаслигимизни, пойтахт сукут сақлашига йўл қўймаслигимизни айтган эдик. Бу ваъдамизни бажардик”, деган Туркия Коммунистик партияси бош котиби Камол Окуян.

Ҳукумат ҳозирча намойишлар ёки қўлга олишлар юзасидан расмий изоҳ бермаган. 

Туркиядаги курдпарвар DEM партияси ҳамраиси Тунжер Бакирхон ва асосий мухолифатдаги Республика халқ партияси (CHP)нинг суд томонидан тайинланган раҳбари Камол Қиличдорўғли бу ҳаракатларни қаттиқ танқид қилган.

“НАТО саммитини баҳона қилиб, бутун мамлакат деярли ҳибсхонага айлантирилди. Биз расман эълон қилинмаган ҳарбий ҳолатга ўхшаш кунларни бошдан кечирмоқдамиз”, деб ёзган Бакирхон X ижтимоий тармоғида.

Туркия прокуратураси эса аввалроқ мазкур операциялар террорчилик гуруҳлари фаолиятини фош этишга қаратилганини билдирган, аммо уларнинг НАТО саммити билан боғлиқлигини тасдиқламаган.

Эслатиб ўтамиз, аввалроқ, 7-8 июль кунлари Анқарада ўтадиган НАТО саммитида альянсга аъзо 32 давлат раҳбарлари ҳамда ҳамкор мамлакатлар вакиллари иштирок этиши хабар қилинганди. 

Саммит олдидан пойтахтда хавфсизлик чоралари кучайтирилган. Намойишлар тақиқланиб, шаҳарнинг катта қисми тўсиқлар билан ўралган ва қатор йўллар ёпилганди. Туркия ҳуқуқ-тартибот идоралари саммит арафасида Анқарада ўтказилган терроризмга қарши рейдлар давомида 225 кишини ушлаган, шулардан 103 нафари ҳибсга олинган эди.

Хабарларга кўра, кеча, 5 июль куни эса мамлакатнинг турли ҳудудларида ўтказилган яна бир қатор терроризмга қарши рейдларда 39 киши, жумладан мустақил ОАВ журналистлари, фаоллар ва академиклар ҳам қўлга олинган.