Германияда зумерлар бош кўтарди: дўконлар талон-торож қилинди

Германиянинг Франкфурт шаҳрида ёшлар намойиши вақтида тартибсизликлар юз берди. Намойишчилар камида иккита дўконни талон-торож қилиб, яна бир нечта савдо нуқтасига зарар етказди. Мамлакатнинг 34 та шаҳрида ўтказилган намойишларда ёшлар таълимга кўпроқ маблағ ажратиш, яшаш харажатларини камайтиришни талаб қилиб, мажбурий ҳарбий хизматга қарши чиқди. Бу ҳақда “Reuters“ хабар берди.

Кеча, 31 октябрь куни “Gen Z regelt“ (“Gen Z бошқаради“) ҳаракати томонидан ташкил этилган намойишларда ўн минглаб одамлар қатнашган. Франкфурт, Берлин ва Мюнхен каби йирик шаҳарларда ўтказилган акцияларда ёшлар таълим, соғлиқни сақлаш ва ижтимоий хизматларни молиялаштиришни яхшилашни талаб қилган.\

“Зўравонлик билан боғлиқ тартибсизликлар давом этмоқда. Шаҳар марказидаги бир нечта дўконнинг ойналари синдирилган. Фавқулодда хизматлар ходимларига ҳам молотов коктейллари улоқтирилмоқда. Барча фуқаролардан шаҳар марказига бормаслик ёки ҳудудни тарк этишни сўраймиз“, дейилади Франкфурт полициясининг X ижтимоий тармоғидаги баёнотида.

Берлиннинг ҳашаматли дўконлари жойлашган Курфюрстендамм кўчасидаги айрим савдо нуқталари ҳам намойишлар олдидан эҳтимолий тартибсизликлардан хавотирланиб, деразаларини ҳимоя панеллари билан тўсиб қўйган.

Ташкилотчилар намойишларда 182 минг киши қатнашишини кутган эди. Бироқ Франкфурт, Мюнхен ва Берлин полицияси жами 18 минг нафаргача намойишчи кўчага чиққанини билдирган. Ташкилотчилар эса ўз сайтида қатнашчилар сонини тахминан 36 минг деб кўрсатган.

Гессен федерал ери ички ишлар вазири Роман Позек Франциядаги тартибсизликларни эслатиб, Германияда ҳам дўконларни талон-торож қилиш, биноларни ёқиш ва полицияга ҳужум қилиш ҳолатлари такрорланмаслиги кераклигини айтган.

Намойишчилар ҳукуматни ёшларнинг муаммоларига етарлича эътибор бермаётганликда айблаган. Мюнхендаги митингда қатнашиши режалаштирилган 18 ёшли Стив ҳукуматни харажатларни қисқартириш ва ёшлар зиммасига қўшимча юк юклашда давом этаётганини танқид қилган.

“Ҳукумат ташвишларимизга жавобан харажатларни қисқартириш ва зиммамизга янада кўпроқ юк юклашда давом этишдан бошқа ҳеч нарса таклиф қилгани йўқ. Бизни эътиборсиз қолдиришни бас қилмагунингизча, тинч йиғилишлар ўтказиш конституциявий ҳуқуқимиздан фойдаланишда давом этамиз“, деган у.

Намойишлар Германияда иқтисодий ўсиш секинлашгани, яшаш харажатлари ошгани ҳамда пенсия тизими ва давлат хизматларига босим кучайгани фонида ўтказилган.

Эслатиб ўтамиз, аввалроқ Германиянинг 34 та шаҳрида оммавий намойишларда 160 мингдан ортиқ одам иштирок этиши кутилаётгани ҳақида хабар берилган эди.