Туркия Украина бўйича музокаралар олиб бориши мумкин – Эрдўған 

north_east

Украинанинг ҳудудий яхлитлиги Туркия учун муҳим – Эрдўған

Туркия Президенти Ражаб Тойиб Эрдўған унинг мамлакати Украинадаги можаронинг ҳал этилишига ҳисса қўшишга ва тегишли музокараларга мезбонлик қилишга тайёр эканини билдирди. Бу ҳақда у ўзининг ижтимоий тармоқлардаги саҳифаларида эълон қилган видеомурожаатида маълум қилди.

“Уч йил аввал можаронинг бошида бўлганимиздек, бугун ҳам урушни музокаралар йўли билан тугатиш учун барча саъй-ҳаракатларимизни ишга солишга аҳд қилдик. Шу билан бирга, биз Украинанинг ҳудудий яхлитлиги, суверенитети ва мустақиллигини қатъий қўллаб-қувватлашда давом этамиз. Ўтган ҳафта Анқарада биз жаноб Владимир Зеленский билан Туркия ушбу муҳим босқичда қандай ҳисса қўшиши ва музокараларга мезбонлик қилиш истагини муҳокама қилдик”, дейди Эрдўған.

Туркия Президентининг сўзларига кўра, у “дипломатия, мулоқот ва музокаралар асосидаги келишувга ёндашувлар қандай кучайиб бораётганини” кўрмоқда.

“Умид қиламизки, бу жараён можарога барҳам бериб, доимий тинчлик ўрнатилишига олиб келади”, дея қўшимча қилди Эрдўған “2025 йил муроса йили бўлишига” умид билдириб.

Эслатиб ўтамиз,  18 февраль куни Туркия Президенти Ражаб Тойиб Эрдўған Украина раҳбари Владимир Зеленский билан учрашганди. Шу куни Туркиянинг биринчи хоними Эмина Эрдўған ҳам Зеленскийнинг турмуш ўртоғи Елена Зеленская билан учрашди.