Украинанинг ҳудудий яхлитлиги Туркия учун муҳим – Эрдўған

Украинанинг ҳудудий яхлитлиги ва суверенитети расмий Анқара учун катта аҳамиятга эга. Бу ҳақда Туркия Президенти Ражаб Тойиб Эрдўған Украина етакчиси Владимир Зеленский билан музокаралар якуни бўйича баёнотида сўз очди.

“Украинанинг ҳудудий яхлитлиги ва суверенитети биз учун жуда муҳим. Биз доимо Туркиянинг бу масалага нисбатан ҳурматини ифода этганмиз. Ушбу масалани барча халқаро учрашувларда кўтарганмиз ва бунга ҳозир ҳам риоя қилмоқдамиз. Кейинги жараёнда ҳам биз учун энг муҳим масалалардан бири – Украинанинг ҳудудий яхлитлигини таъминлаш бўлади. Биз дунёда ҳеч ким мағлуб бўлмаслигини истаймиз”, дейди Туркия етакчиси.

Эрдўғанга кўра, гап тинчликка имкон қадар тезроқ эришиш ҳақида кетмоқда. Шу маънода, Зеленский тинчлик тарафдори эканини очиқ-ойдин айтмоқда.

“Умид қиламанки, Туркия Ташқи ишлар вазирининг ўз мавқедошлари билан учрашувлари, шунингдек, менинг жаноб Путин билан учрашувларим давомида биз тинчлик йўлини очамиз, зарур қадамларни қўямиз ва бу йўлда ҳаракат қиламиз”, дейди Туркия раҳбари.

Бундан ташқари, Эрдўған Россия ва Украина ўртасидаги музокаралар учун Туркия “идеал жой” бўлиши мумкинлигини ҳам таъкидлаган.

Эслатиб ўтамиз, кеча, 18 февраль куни Украина раҳбари Владимир Зеленский Туркияга ташриф буюриб, мамлакат Президенти Ражаб Тойиб Эрдўған билан учрашганди. Эрдўған Анқарада музокаралар бошланишидан аввал украиналик мавқедошини президентлик мажмуаси кираверишида кутиб олган. Шундан сўнг, икки давлат раҳбарлари Туркия ва Украина давлат байроқлари фонида эсдалик суратга тушган. Улар Украина инқирозидан ташқари, Анқара ва Киев ўртасидаги стратегик шериклик ҳамда ҳамкорликни янада мустаҳкамлаш бўйича қадамларни муҳокама қилган. 

Шунингдек, Туркиянинг биринчи хоними Эмина Эрдўған ҳам расмий ташриф билан мамлакатда бўлиб турган Владимир Зеленскийнинг турмуш ўртоғи Елена Зеленская билан учрашган. Давлат раҳбарларининг рафиқалари Украинанинг Одесса шаҳридаги 3-сонли ихтисослаштирилган психоневрологик болалар уйидан 34 нафар ногиронлиги бўлган етим болани Анқарадаги “Сонечко” уйига эвакуация қилишда иштирок этган.