Тўқаев Ғазодаги тинчлик келишувини олқишлади

Қозоғистон Президенти Қосим-Жомарт Тўқаев Исроил ва ҲАМАС ўртасида тинчлик режасининг биринчи босқичи имзоланганига муносабат билдирди. Бу ҳақда Президент матбуот котиби Руслан Желдибай ўзининг Telegram-каналида ёзиб қолдирди.

Президент матбуот котибининг ёзишича, давлат раҳбари Мисрда бўлиб ўтган билвосита музокаралар чоғида Ғазо секторида ўт очишни тўхтатиш ва гаровдагиларни озод этиш бўйича эришилган келишувни қўллаб-қувватлаган.

“Давлат раҳбари Миср, Қатар ва Туркиянинг воситачилик фаолияти самарали бўлганини, шунингдек, АҚШ Президенти Дональд Трамп бошчилигидаги АҚШнинг Яқин Шарқда барқарор тинчликка эришиш бўйича музокара жараёнига қўшган алоҳида ҳиссасини таъкидлади”, дейилади хабарда. 

Эслатиб ўтамиз, аввалроқ Трамп Исроил ва ҲАМАС тинчлик режасининг биринчи босқичи бўйича келишувни имзолаганини эълон қилганди. Келишувга кўра, ҲАМАС барча гаровдагиларни озод қилади, Исроил эса ўз қўшинларини келишилган чизиққа қайтаради.

Шундан сўнг, Трамп ва Исроил Бош вазири Биньямин Нетаньяху телефон орқали суҳбат ўтказгани маълум бўлди. 

Бундан ташқари, Трамп шу ҳафтанинг охирида Миср ва Ғазо секторини ҳам ўз ичига олган Яқин Шарққа ташриф буюрмоқчи эканини билдирган.