Трампнинг одами Россияга боради

АҚШ Президенти Дональд Трамп ўзининг махсус вакили Стив Уиткофф Россияга ташриф буюришини эълон қилди. Бу ҳақда у кеча, 31 июль куни Оқ уйда журналистлар билан суҳбат чоғида Уиткоффнинг хорижий сафарлари ҳақида саволга жавоб берар экан билдирди.

“У Исроилга кетмоқда, кейин эса ишонасизми йўқми Россияга боради,” дейди Трамп.

АҚШ етакчиси мазкур ташриф ҳақида бошқа маълумот бермаган.

Эслатиб ўтамиз, 14 июль куни Трамп Россияга ва унинг савдо ҳамкорларига нисбатан 100 фоизлик иккиламчи бож тўловларини жорий этиш билан таҳдид қилган эди. Шунингдек, аввалига Оқ уй раҳбари Россияга ҳарбий ҳаракатларни тўхтатиш учун 50 кунлик муддат берган, бироқ жорий йилнинг 28 июль куни бу муддатни 10-12 кунгача қисқартирганди.

29 июль куни АҚШ етакчиси Россияга берган 10 кунлик ультиматум муддати 8 августда якунланишини айтди. У Россия Президенти Владимир Путиндан умидлари оқланмаганини билдириб, унинг таҳдидларига жавоб бермаганидан норозилигини изҳор этди. Трамп Россиядан энергия ресурслари харид қилаётган мамлакатларга нисбатан ҳам 10 кунлик муддат тугагач иккиламчи бож тўловлари жорий этишини ваъда қилди.