Путинда 10 кун муҳлат бор – Трамп (видео)

Россия Украина билан ҳарбий ҳаракатларни тўхтатиши учун 10 кунлик муҳлатга эга. Бу ҳақда кеча, 29 июль куни АҚШ Президенти Дональд Трамп Шотландиядан учиб кетишидан аввал Air Force One бортида журналистларга маълум қилди.

“Бугундан бошлаб 10 кун,” деди Трамп журналистларга.

АҚШ раҳбарининг билдиришича, ушбу муддат тугаганидан сўнг Вашингтон Россияга нисбатан аввал ваъда қилинган божлар “ва бошқа чораларни” жорий қилади. Бироқ Трамп бу чоралар Россияга таъсир қиладими-йўқми, аниқ эмаслигини қайд этди.

“Улар таъсир қилиши мумкин, ёки таъсир қилмаслиги ҳам мумкин,” деган у ва Россия Президенти Владимир Путин, эҳтимол, урушни давом эттиришни истаётганини билдирган.

Трампнинг сўзларига кўра, у Москвага берган янги муҳлатга ҳозирча Россия томонидан ҳеч қандай муносабат билдирилмаган.

“Бу ачинарли”, дея изоҳ берган Трамп.

Ушбу баёнот ортидан Трампдан Россияга қарши санкциялар нефть бозори вазиятига таъсир қилиши мумкинлигидан хавотири борми, деб сўрашди. АҚШ Президенти эса: “Мен бу борада хавотирда эмасман,” деб жавоб берган.

Эслатиб ўтамиз, жорий йилнинг июль ойи ўрталарида Трамп Россия агар 50 кун ичида Киев билан ўт очишни тўхтатиш бўйича келишувга эришмаса, АҚШ Россия ва унинг савдо ҳамкорларига нисбатан бож солиғи жорий қилишини айтган эди.

Жорий йилнинг 28 июль куни эса Трамп Россия Президенти Владимир Путиндан ҳафсаласи пир бўлганини билдирди ва Москвага берган 50 кунлик муддатни қисқартиришга қарор қилганини маълум қилганди. Кейинроқ у бу муҳлатни 10-12 кунгача қисқартиришини аниқ айтди. Шунингдек, Трамп энди Путин билан музокараларга қизиқмаётганини билдирди.

Россия Президенти матбуот котиби Дмитрий Песков журналистлар билан ўтказилган матбуот анжуманида Россия АҚШ Президенти Дональд Трампнинг Украинада урушни тўхтатиш бўйича берган баёнотларини инобатга олишини айтди.