Трамп Россияга берган муддатни 10-12 кунгача қисқартирди

АҚШ Президенти Дональд Трамп Украинада ўт очишни тўхтатиш учун Россияга берган муддат бугундан бошлаб 10-12 кунга қисқартирилганини айтди. Бу ҳақда Америка етакчиси Шотландияда журналистларга Британия Бош вазири Кир Стармер билан музокаралар якунида айтиб ўтди.

“Мен бугундан бошлаб янги муддат белгилайман – ўн ёки 12 кун. 50 кун кутишнинг маъноси йўқ. Мен сахий бўлишни хоҳлайман, лекин биз ҳеч қандай тараққиётни кўрмаяпмиз”, деди Оқ уй раҳбари.

АҚШ Президентининг сўзларига кўра, у Россияга нисбатан янги чекловларга мурожаат қилмасликни афзал кўради ва ҳали ҳам Украинадаги жанговар ҳаракатлар тўхтатилишига умид қилмоқда. Трамп яқин 24 соат ичида “ультиматум” қўйиш муддати бўйича якуний қарорни қабул қилишини таъкидлади.

“Бугун кечқурун ёки эртага эълон қиламан”, деди сиёсатчи.

Бугун эртароқ АҚШ Президенти Дональд Трамп Украинада ўт очишни тўхтатиш учун Россияга берган 50 кунлик муддатни қисқартираётганини айтганди.Ўшанда унинг Буюк Британия Бош вазири Кир Стармер билан учрашуви энди бошланаётган эди.

Бундан ташқари, Оқ уй раҳбари россиялик мавқедоши Владимир Путиндан “ҳафсаласи пир бўлганини” таъкидлади.

“Менинг Президент Путиндан ҳафсалам пир бўлди, ундан жуда ҳафсалам пир бўлди. Мен унга берган 50 кунни қисқароқ рақамга қисқартирмоқчиман, чунки мен нима бўлишини аллақачон биламан, деб ўйлайман”, деди Трамп.

Трампнинг сўзларига кўра, у Путин билан бир неча бор музокаралар олиб борган, бироқ кейин Россия Президенти “Киев каби қайсидир шаҳарга ракеталарни учиришни бошлайди” ва “кўп одамларни ўлдиради”.

Эслатиб ўтамиз, 14 июль куни Трамп, агар Москва Украинада 50 кун ичида ўт очишни тўхтатиш бўйича келишувга эришмаса, Россия ва унинг савдо ҳамкорларига “тахминан 100%” иккиламчи тарифларни эълон қилганди.