Трамп Зеленскийнинг таклифини рад этди

АҚШнинг собиқ президенти Дональд Трамп Украина раҳбари Владимир Зеленскийнинг мамлакатга ташриф буюриш таклифини рад этди. Бу ҳақда у кеча, 6 ноябрь куни “Newsmax” телевизион тармоғига берган баёнотида маълум қилди.

“Мен Президент Зеленскийни ҳурмат қиламан, лекин ҳозирда Украинага сафар қилиш ноўрин, деб ҳисоблайман. Байден маъмурияти ҳозирда у билан шуғулланмоқда ва мен манфаатлар тўқнашувини яратмоқчи эмасман”, деган Трамп. 

Маълумот учун, 5 ноябрь куни Зеленский NBC телеканалига берган интервьюсида Трампни Украинага таклиф қилган ва АҚШ собиқ президентига урушни 24 соат ичида тинч йўл билан тўхтатиб бўлмаслигини 24 дақиқада тушунтириб қўйишини айтган.

"Шундай қилиб, мен президент Трампни таклиф қиламан. Агар у бу ерга кела олса, менга 24 дақиқа керак бўлади – ҳа, 24 дақиқа, ундан кўп эмас. Президент Трампга бу урушни тўхтатишнинг имкони йўқлигини тушунтиришимга йигирма тўрт дақиқа етади", деган Зеленский. 

Шунингдек, Зеленский АҚШни Россияга қарши туришда ёрдам бериш учун кўпроқ маблағ ажратишга чақирган ва агар Вашингтон қўллаб-қувватлашни кучайтирмаса, америкалик аскарлар охир-оқибат Россия билан Европадаги катта можарога тортилиши мумкинлигидан огоҳлантирган.

“Агар Россия барчамизни ўлдирса, НАТО давлатларига ҳужум қилади ва сиз ўғил-қизларингизни жангга юборасиз”, дейди Зеленский.

Эслатиб ўтамиз, Трамп 2024 йилда АҚШ президентлигига сайланса, Украинадаги можарони 24 соат ичида ҳал қила олишини бир неча бор таъкидлаган.