Трамп Зеленскийнинг “қулоғини чўзиб қўйди“

АҚШ Президенти Дональд Трамп Украина Президенти Владимир Зеленскийни Россиядаги нефтни қайта ишлаш заводларига берилаётган зарбаларни камайтиришга чақирганини айтди. Зеленский эса бунга рози бўлиши мумкинлигини билдирди. Бу ҳақда Трамп бугун, 28 сентябрь куни Оқ уйда журналистларга берган баёнотида маълум қилди.

“Мен Президент Зеленский билан гаплашдим. Унга нефтни қайта ишлаш заводларига зарбаларни камайтириш кераклигини айтдим. У: “Эҳтимол, шундай қилармиз”, деб жавоб берди”, деган Трамп.

АҚШ Президенти Россия нефтьни қайта ишлаш заводларига ҳужумлар дунёда энергия, хусусан, дизель ёнилғиси нархининг ошишига сабаб бўлаётганини билдирган. Унинг сўзларига кўра, энергия нархларининг кўтарилишини фақат Яқин Шарқдаги вазият билан боғлаш тўғри эмас.

“Муаммонинг асосий сабаби Россияда нефтьни қайта ишлаш заводлари портлатилаётганидир. Бу Яқин Шарқ муаммоси эмас, балки кўпроқ Украина ва Россия ўртасидаги муаммо”, деган у.

Маълумотларга кўра, 2026 йил бошидан буён Украина Қуролли кучлари Россиядаги нефтьни қайта ишлаш заводларига 70 мартадан ортиқ зарба берган. Ҳужумлар оқибатида бир неча ўнлаб заводларнинг фаолияти издан чиққан. Фақат август ойида олтита йирик завод таъмирлаш учун фаолиятини тўхтатган.

“EA Analytics” маълумотларига кўра, заводлар фаолиятидаги узилишлар сабаб Россияда нефтни қайта ишлаш ҳажми 2002 йилдан бери энг паст даражага тушган. Бу мамлакатда ёқилғи танқислиги юзага келиши ва унинг экспортига тақиқ жорий этилишига сабаб бўлган.

Эслатиб ўтамиз, аввалроқ ҳам Трамп Зеленскийни Россиянинг дизель ёнилғиси билан боғлиқ объектларига зарба беришни тўхтатишга чақирган эди. Кейинчалик у Украина ва Россия энергетика объектларига ўзаро ҳужумларни тўхтатишга келишиб олганини маълум қилган. Бироқ Киев ва Москва энергетик сулҳга тайёрлигини амалда тасдиқламаган.