Трамп Зеленскийга дакки берди

АҚШ Президенти Дональд Трамп Украина Президенти Владимир Зеленскийни Россиядаги дизель ёнилғиси инфратузилмасига ҳужумларни тўхтатишга чақирди. Унинг айтишича, бундай зарбалар ёнилғи тақчиллигини кучайтириб, бутун дунёга зарар етказмоқда. Бу ҳақда у кеча, 13 сентябрь куни Ирландияда бўлиб ўтган Irish Open golf турнирига ташрифи чоғида журналистларга берган баёнотида сўз очди.

“Жаноб Зеленский битта ишни қилиши керак: у Россиядаги дизель ёнилғисини ишлаб чиқариш объектларини йўқ қилишни тўхтатиши керак”, деган АҚШ Президенти.

Унинг сўзларига кўра, Вашингтон бу масалани Зеленский билан муҳокама қилган.

“Бошқа нишонлар етарли. Дизель ёнилғисига зарба берманг. Бу бутун дунёга зарар етказмоқда”, дея қўшимча қилган Трамп.

Сўнгги ойларда Украина узоқ масофага учувчи дронлар ёрдамида Россия нефтини қайта ишлаш заводларига бир қатор ҳужумлар уюштирди. Бу зарбалар Россияда ёнилғи ишлаб чиқариш ҳажмининг камайишига ва мамлакат бўйлаб бензин тақчиллиги юзага келишига сабаб бўлмоқда.

Украина эса ўзининг энергетика инфратузилмаси Россия томонидан мунтазам ҳужумларга учраётганини таъкидлаб, Россиянинг нефтни қайта ишлаш заводларини қонуний ҳарбий нишонлар деб ҳисоблашини билдирган.

Шунингдек, Трамп глобал ёнилғи тақчиллигига Яқин Шарқдаги вазият эмас, Россия ва Украина ўртасидаги уруш сабаб бўлаётганини айтган.

“Бу тақчилликни Яқин Шарқ келтириб чиқармаяпти, бунга Россия ва Украина ўртасида содир бўлаётган воқеалар сабаб бўлмоқда”, деган у.

Эслатиб ўтамиз, аввалроқ АҚШ Президенти Дональд Трамп Россия Президенти Владимир Путинни Украинадаги урушни якунлаш бўйича келишув тузишни исташини айтган эди.