Трамп ва Путин саммитига тайёргарлик давом этмоқда – Орбан

АҚШ Президенти Дональд Трамп ва Россия Президенти Владимир Путин иштирокида Венгриянинг Будапешт шаҳрида бўлиб ўтиши режалаштирилган учрашувга тайёргарлик давом этмоқда. Бу ҳақда Венгрия Бош вазири Виктор Орбан Facebook саҳифасида ёзиб қолдирди.

“Венгрия Ташқи ишлар вазири Петер Сийярто Вашингтонда. Тинчлик саммитига тайёргарлик давом этмоқда. Сана ҳали белгиланмаган. Вақти келганда биз уни ўтказамиз”, дея пост қолдирган Орбан. 

Ўз навбатида, Петер Сийярто Россия ва АҚШ Президентлари саммити бекор қилинмоқда, деган гапларни нотўғри деб атаган. Унинг фикрича, бунга сабаб – томонлар аниқ санани келишиб олмаганидир.

“Мен бу саммит бўлишига жуда умид қиламан. Сана ҳали эълон қилинмаган бир пайтда, қандай қилиб кўчириш ҳақида сўз юритиш мумкинлигини тушунмайман”, деган Венгрия ТИВ раҳбари. 

Венгер вазирига кўра, тадбирга тайёргарлик давом этмоқда ва Будапешт ўз томонидан учрашув бўлиб ўтиши учун “қўлидан келган барча ишни” қилмоқда.

Унинг сўзларига кўра, у АҚШ Давлат котиби Марко Рубио билан учрашиб, саммит тафсилотларини муҳокама қилиши керак. Сийярто бу учрашувдан сўнг вазият “янада аниқроқ бўлишига” умид билдирган.

Эслатиб ўтамиз, 16 октябрь куни Владимир Путин ва Дональд Трамп телефон орқали суҳбатлашганди. Суҳбат тахминан икки соат давом этди. Мулоқот якунида улар жорий йилда иккинчи шахсий учрашувни ўтказишга келишиб олди ва унинг жойи сифатида Будапешт танланди. Суҳбатдан сўнг Россия Ташқи ишлар вазири Сергей Лавров ва АҚШ Давлат котиби Марко Рубио ўртасидаги музокаралар ортидан АҚШ ОАВлари Оқ уй расмийсига таяниб, саммитга тайёргарлик вақтинча тўхтатилганини хабар қилган эди. Шундан сўнг, Трамп журналистларга учрашув бўйича якуний қарор ҳали қабул қилинмаганини айтган.