Трамп ва Мерц Макроннинг таклифини ерда қолдирмоқчи

Франция Президенти Эммануэль Макрон Парижда G7 саммитини ўтказиш ҳақида таклиф берди. У АҚШ Президенти Дональд Трамп томонидан қўллаб-қувватланмади. Бу ҳақда Оқ уй раҳбари журналистларга берган интервьюсида айтиб ўтди. 

Трамп журналистнинг Европага режалаштирилган сафари доирасида Париждаги саммитга борадими, деган саволига рад жавобини берган. 

Германия ҳукуматидаги манбаларнинг хабар беришича, Германия канцлери Фридрих Мерц ҳам Макрон таклиф қилган кунда Парижга боришни режалаштирмаяпти. У Давосдаги Жаҳон иқтисодий форумида нутқ сўзлагач, тўғридан тўғри Брюсселда ўтадиган Европа Иттифоқи саммитига учиб кетади.

Трамп ўзининг Truth Social ижтимоий тармоғида Эммануэль Макрон томонидан юборилгани айтилаётган хабарларнинг “скриншот”ларини эълон қилди. Ушбу хабарларда Макрон Трампга Парижда учрашишни таклиф қилган. 

“Президент Макрондан Президент Трампга.  Дўстим, биз Сурия масаласида бир хил позициядамисиз. Эрон бўйича катта ишлар қилишимиз мумкин. Гренландия масаласида нима қилаётганингни тушунмаяпман. Келинг, катта ишлар қилайлик. Сизни Париждаги G7 учрашувига таклиф қиламан. Унга украинлар, данияликлар, сурияликлар ва россияликлар ҳам келади”, дейилади Макроннинг хабарида. 

Трамп ушбу таклифга жавоб берган ёки йўқлигини очиқламаган. 

Қайд этиш жоиз, Оқ уй раҳбари бугун, 21 январь куни Швейцариянинг Давос шаҳрида бўлиб ўтадиган Жаҳон иқтисодий форумида нутқ сўзлаши кутилмоқда. Форум доирасида у турли давлатлар раҳбарлари ва ҳукумат бошлиқлари, шунингдек бизнес вакиллари билан учрашувлар ўтказишни режалаштирган.

Фридрих Мерц ҳам АҚШ Президенти билан Давосда учрашишга умид қилмоқда, бироқ бундай учрашув бўладими ёки йўқми ҳозирча номаълум. 

Эслатиб ўтамиз, Эммануэль Макрон Давосда иқдисодий форумдаги чиқишида АҚШ Европани заифлаштириш ва бўйсундиришга уринаётгани ҳақида айтганди. Франция етакчисининг айтишича, божлар суверенитетга босим ўтказиш воситаси сифатида қўлланмоқда. Бу мутлақо қабул қилиб бўлмайдиган ҳолат.