Трамп рафиқаси туфайли Россияга таҳдид қила бошлади – конгрессмен 

Америкалик республикачи конгрессмен Дон Бэкон АҚШ Президенти Дональд Трампнинг Украина ҳақидаги риторикасини ўзгартиришга унинг рафиқаси Мелания ёрдам берган, деб тахмин қилди. Бу ҳақда у “News Nation”телеканалининг “The Hill Sunday” дастурига берган интервьюсида сўз очди.

“Хўш, Президент Украинага нисбатан ўз позициясини ўзгартирганидан хурсандман. Менимча, бунинг учун Меланияга раҳмат айтишимиз керак”, деди Бэкон 

Британиянинг “The Times” нашри ҳам Мелания Трамп турмуш ўртоғининг Киевга қурол етказиб беришни қайта тиклаш қарорига таъсир қилгани ҳақида хабар берган. “The Times”нинг ёзишича, Оқ уйда миллий хавфсизлик бўйича маслаҳатчилар ва ташқи сиёсат таҳлилчилари кўп бўлишига қарамай, АҚШ Президентининг рафиқаси фикри энг муҳими бўлиши мумкин.

“Трамп маълум бир масалалар бўйича баъзи одамларни тинглайди, айниқса, агар улар унга жуда яқин бўлса ёки уларнинг фамилияси Трамп бўлса”, дейди биринчи хоним ҳақидаги китоб муаллифи Мэри Жордан.

Шу билан бирга, ўтган ҳафта Вашингтон яқинидаги Эндрю ҳарбий базасида журналистлар саволларига жавоб берар экан, Трампнинг ўзи рафиқаси Украина можаросида нейтрал позицияни эгаллашини айтди. Оқ уй раҳбари унинг позицияси Мелания фикрига тўғри келишини қўшимча қилди.

14 июль куни Трамп Вашингтон Киевга қурол-яроғ ва ҳарбий техникани Европа бундай етказиб бериш учун тўласа, ўтказишни давом эттиришга қарор қилганини маълум қилди. НАТО бу жараённи мувофиқлаштиради.

CNN манбаларига таяниб, хабар беришича, Қўшма Штатлар Patriot тизимларидан ташқари яқин масофали ракеталар ва гаубицалар учун ўқ-дориларни кейинчалик Украинага етказиб бериш учун НАТО мамлакатларига ҳам бериши мумкин.