Трамп Канада Бош вазирини “Президент” деб чалкаштирди (видео)

АҚШ Президенти Доналдь Трамп Канада бош вазири Марк Карнининг лавозимини чалкаштириб, уни “Президент” деб атади.  Бу ҳақда BBC хабар берди.

Қайд этилишича, воқеа жорий йилнинг 12 октябрь куни Шарм ал-Шайхдаги “тинчлик саммити”да содир бўлган. Трамп декларациялар имзоланганидан сўнг, саммитда сўзга чиққан. АҚШ раҳбари учрашувда ҳозир бўлган барча давлат раҳбарларига алоҳида миннатдорлик билдирган. Бироқ Карнини раҳбарлар орасидан топа олмай, Трамп бир лаҳза довдираб қолган.

Канада Бош вазири ҳақида гапираётиб, Трамп хатога йўл қўйиб, уни “Президент” деб атаган. Шундан сўнг, Карни АҚШ Президентига яқинлашиб, ҳазил оҳангида: “Мени президентликка кўтарганингиз учун раҳмат”, деган.

Бунга жавобан Трамп: “Яхшиямки, мен губернатор демадим”, дея жавоб қайтарган.

Бу Трампнинг Мисрдаги саммитдаги ягона хатоси эмас. У Арманистон Бош вазири Николь Пашинянни Озарбайжон Президенти Илҳом Алиевнинг “ватандоши” деб атаб, инглизча – "compatriot" сўзини ишлатган.

Инглиз тилининг Oxford ва Cambridge луғатлари бу сўзни “ватандош” деб таржима қилади. Бу сўзнинг бошқа маънолари орасида “ҳамкор дўст” ёки “ўртоқ” ҳам келтирилган. Бундан ташқари, “тинчлик саммити”да Миср Президенти Абдулфаттоҳ ас-Сиси узатган қўлни эътиборсиз қолдирган. Сентябрь ойида эса у Арманистонни Албания билан адаштириб, Албания ва Озарбайжон ўртасидаги можарони тўхтатганини айтган эди.

Эслатиб ўтамиз, аввалроқ АҚШ Президенти Дональд Трамп Исроил Президенти Ицхак Герцогга коррупция иши бўйича суд қилинаётган Бош вазир Биньямин Нетаньяхуни афв этиш масаласини кўриб чиқишни таклиф қилганди.