Трамп Нетаньяхуни афв этишга чақирди

АҚШ Президенти Дональд Трамп Исроил Президенти Ицхак Герцогга коррупция иши бўйича суд қилинаётган Бош вазир Биньямин Нетаньяхуни афв этиш масаласини кўриб чиқишни таклиф қилди. Бу ҳақда у бугун, 13 октябрь куни  Кнессетдаги (Исроил парламенти) нутқи чоғида сўз очди.

“Жаноб Президент, нега уни афв этмаслигингиз керак? Ёқса-ёқмаса, у уруш даврининг энг яхши раҳбарларидан бирига айланди. Сигаралару шампанларга келсак, бу билан кимнинг иши бор ўзи?” деган АҚШ Президенти Герцогга мурожаат қилиб.

Кнессет аъзолари бу чақириқни қарсаклар ва “сигара ва шампанлар, бўлсин!” деган қичқириқлар билан қарши олган.

Маълумот учун, Исроилда Нетаньяхуга учта иш бўйича – порахўрлик, фирибгарлик ва ишончни суиистеъмол қилиш айбловлари қўйилган. Хусусан, у тадбиркорлардан қимматбаҳо совғалар – сигаралар ва шампанлар олганликда, шунингдек, оммавий ахборот воситаларига ижобий ёритув эвазига таъсир ўтказишга уринганликда айбланмоқда.

Эслатиб ўтамиз, аввалроқ Дональд Трамп Кнессет биносида юраётган пайтда журналистнинг “Уруш энди расман тугадими?” деган саволига “Ҳа”, деб жавоб бергани ҳақида хабар берилган эди.

Бугун, 13 октябрь куни эрталаб АҚШ Президенти Дональд Трамп гаровдагиларни озод қилиш жараёни давом этаётган бир пайтда Исроилга етиб борганди. Бен-Гурион аэропортида катта Исроил делегацияси – Бош вазир Биньямин Нетаньяху ва унинг рафиқаси Сара бошчилигида – президентни кутиб олди. Шунингдек, Исроил Президенти Ицҳок Герцог, АҚШнинг Исроилдаги элчиси Майк Ҳаккаби ва оташкесим битимини тузишда ёрдам берган Трампнинг куёви Жаред Кушнер ҳам ўша ерда эди. Унга Иванка Трамп ҳамроҳлик қилди.