Трамп Ғазода Тинчлик кенгаши тузилганини эълон қилди

АҚШ Президенти Дональд Трамп кеча, 15 январь куни Ғазо секторини қайта тиклаш ишларини бошқарувчи Тинчлик кенгаши тузилганини маълум қилди. Ушбу тузилма ташкил этилиши Трампнинг Ғазо бўйича тинчлик режасининг муҳим қисми бўлиб, режа халқаро кучларни жойлаштириш масаласини ҳам ўз ичига олади. Бу ҳақда Оқ уй етакчиси ўзининг Truth Social тармоғида ёзиб қолдирган. 

АҚШ етакчисининг сўзларига кўра, Тинчлик кенгашига Трампнинг шахсан ўзи раислик қилади.

“Мен Тинчлик кенгаши ташкил этилганини эълон қилишдан жуда ҳам мамнунман. Кенгаш таркиби яқин кунларда эълон қилинади, бироқ ишонч билан айта оламанки, бу исталган жойда ва исталган вақтда тузилган энг буюк ва энг нуфузли кенгаш бўлади”, дея ёзган Оқ уй раҳбари. 

ОАВга кўра, Тинчлик кенгаши тузилгани ҳақидаги хабар Ғазода урушдан кейинги кундалик ҳаётни бошқариш учун 15 кишидан иборат маъмурият ташкил этилгани эълон қилинганидан кўп ўтмай маълум қилинди. Ушбу маъмурият Тинчлик кенгаши назорати остида фаолият юритади.

“Тинчлик кенгаши раиси сифатида мен янги тайинланган технократик ҳукуматни қўллаб-қувватлайман”, дея таъкидлаган Оқ уй раҳбари. 

“The Telegraph” газетаси хабарига кўра, Тинчлик кенгаши таркибига Буюк Британия, Германия, Франция, Италия, Саудия Арабистони, Қатар, Миср ва Туркия вакиллари кириши мумкин.

14 январь куни АҚШ Президентининг махсус вакили Стивен Уиткофф Трамп номидан Ғазода ўт очишни тўхтатиш жараёнининг иккинчи босқичи бошланганини эълон қилган эди. Ушбу босқич, жумладан, ҲАМАСни қуролсизлантириш ҳамда Фаластин полициясини қўллаб-қувватлаш мақсадида Ғазо секторига халқаро кучларни жойлаштиришни назарда тутади.

Декабрь ойида ҲАМАС ҳаракати маълум шартлар асосида қуролни топширишга тайёрлигини билдирган эди. Хусусан, Ҳамас Исроил қўшинлари Ғазо секторидан тўлиқ олиб чиқилиши шарти билан бунга рози бўлишини маълум қилган.

Маълумот учун, ҲАМАСнинг 2023 йил 7 октябрь куни Исроилга қилган ҳужуми Яқин Шарқдаги кескинлашувнинг бошланиш нуқтаси бўлди. Ўшанда гуруҳ аъзолари Исроил ҳудудига ракета зарбалари йўллаб, мамлакат ҳудудига бостириб кирган ҳамда замонавий Исроил тарихидаги энг йирик оммавий қирғинни амалга оширган. Оқибатда қарийб 1200 киши ҳалок бўлди, 250 га яқин одам гаровга олиниб, Ғазога олиб кетилди. Кейинчалик гаровдагиларнинг бир қисми алмашув йўли билан озод қилинди, айримлари эса ҳалок бўлди.

Бунга жавобан Исроил ҲАМАСга қарши уруш эълон қилди. Ғазо секторида ўтказилган қуруқлик операциялари ва бомбардимонлар оқибатида 70 мингдан ортиқ фаластинлик ҳалок бўлган, 169 мингдан зиёд киши яраланган