Трамп Эроннинг янги таклифини ҳам рад этди

АҚШ Президенти Дональд Трамп Эрон томонидан таклиф қилинган уч босқичли тинчлик режасини рад этди. Бу ҳақда у “Kan News” каналига берган интервьюсида сўз очди.

У интервьюда Вашингтон Эрон тақдим этган янги таклифни кўриб чиққанини, аммо у “қабул қилиб бўлмайдиган” эканини айтган.

Шунингдек, Трамп Исроил Президенти Исхак Герцогга мурожаат қилиб, Исроил Бош вазири Биньямин Нетаньяхуни афв этишга чақирган. Унинг таъкидлашича, уруш шароитида мамлакатга эътиборини фақат ҳарбий вазиятга қаратадиган Бош вазир зарур.

Эслатиб ўтамиз, Эрон АҚШга урушни якунлаш бўйича янги – 14 банддан иборат режа юборган эди. Айрим маълумотларга кўра, бу режа уч босқични ўз ичига олади: аввало ўт очишни тўхтатиш, кейин музокаралар орқали узоқ муддатли келишувга эришиш.

Режада, шунингдек, Ҳормуз бўғозини очиш, уранни бойитишни 15 йилгача музлатиш таклиф қилинган, бироқ ядровий объектларни бутунлай йўқ қилиш рад этилган.

Шу билан бирга, Исроил Бош вазирига қарши ишлар ҳам эслатиб ўтилган. У 2016 йилдан бошлаб коррупция билан боғлиқ тергов остида бўлиб, 2019 йилда расмий айбловлар эълон қилинган. Унга қимматбаҳо совғалар олиш ва ОАВ билан боғлиқ ноқонуний келишувларда иштирок этиш айби қўйилган, бироқ у бу айбловларни рад этади.

Трамп эса Эрон таклиф қилган шартлар АҚШ манфаатларига мос келмаслигини билдириб, уни рад этган.