Эрон АҚШга 14 бандлик тинчлик режасини юборди

Эрон АҚШга можарони якунлаш бўйича 14 банддан иборат тинчлик режасини юборди. Бу ҳақда “Tasnim” хабар берди.

ОАВ ҳужжатда урушни тўхтатиш учун асосий шартлар ва келишув йўл харитаси баён қилинган.

Маълум қилинишича, ҳужжат Покистон томони орқали Теҳрон ва Вашингтон ўртасидаги музокаралар доирасида етказилган. Бу режа АҚШ томонидан илгари сурилган 9 бандли таклифга жавоб ҳисобланади.

Нашр маълумотига кўра, Эрон асосий масалаларни 30 кун ичида ҳал этишни талаб қилмоқда. АҚШ таклиф қилган икки ойлик сулҳ ўрнига Теҳрон “урушни тўлиқ якунлаш”га урғу бермоқда.

Режада қуйидаги асосий талаблар келтирилган:

• ҳарбий ҳаракатларни тўхтатиш;
• АҚШ томонидан ҳужум қилмаслик кафолатлари;
• АҚШ қўшинларини чегарага яқин ҳудудлардан олиб чиқиш;
• денгиз блокадасини бекор қилиш;
• Эрон активларини муздан чиқариш;
• компенсация тўлаш;
• санкцияларни бекор қилиш;
• Ливан каби йўналишларда ҳам ҳарбий ҳаракатларни тўхтатиш.

Шунингдек, ҳужжатда Ҳормуз бўғозидаги вазиятни тартибга солиш механизми бўйича таклифлар ҳам мавжуд.

Ҳужжат Эрон давлат органларида ички келишувлардан ўтгач юборилган.

Эрон АҚШдан ушбу таклифларга расмий жавоб кутмоқда.

АҚШ Президенти Дональд Трамп эса Эрон томонидан таклиф қилинган шартлар қабул қилиниши эҳтимолдан йироқ эканини айтган. Унинг сўзларига кўра, Вашингтон режани ўрганади, бироқ уни мақбул деб ҳисобламайди.

“Axios” нашри музокаралар боши берк кўчага кириб қолган фонида АҚШ Эронга қарши “қисқа, аммо кучли зарбалар” вариантини ҳам кўриб чиқаётганини хабар қилган.

Эслатиб ўтамиз, аввалроқ Эрон томонидан берилган зарбалар Яқин Шарқдаги камида 16 та АҚШ ҳарбий объектига жиддий зарар етказганди.