Трамп BRICS ва унинг иттифоқчиларига янги божлар билан таҳдид қилди

BRICS давлатлари томонидан “бир томонлама тариф ва нотариф чоралари” танқид қилинган бир пайтда, АҚШ Президенти Дональд Трамп кеча, 6 июль куни ушбу ташкилотнинг “антиамериканча сиёсатини” қўллаб-қувватлаган мамлакатларга қўшимча бож жорий этиш билан таҳдид қилди. Бу ҳақда у ўзининг Truth Social ижтимоий тармоғида ёзди.

“Агар бирон-бир давлат BRICS’нинг антиамериканча сиёсатига қўшилса, унга 10% қўшимча тариф қўлланилади. Бу сиёсатда ҳеч қандай истисно бўлмайди”, деб ёзди АҚШ Президенти.

Шу куни BRICS мамлакатлари Рио-де-Жанейрода бўлиб ўтган саммитдан сўнг қўшма баёнот эълон қилганди. Унда “савдони бузадиган ва ЖСТ (Жаҳон савдо ташкилоти) қоидаларига мос келмайдиган бир томонлама тариф ва нотариф чоралар сонининг кўпайиши жиддий ташвиш уйғотаётган”и қайд этилган.

“Бу каби чоралар жаҳон савдоси ҳажмини янада қисқаришига ва глобал таъминот занжирларининг бузилишига олиб келиши мумкин, бу эса мавжуд иқтисодий мувозанатсизликни чуқурлаштириб, глобал иқтисодий ривожланиш истиқболларига салбий таъсир кўрсатади”, деб қайд этилди ҳужжатда.

Гарчи АҚШ ёки Дональд Трамп ҳужжатда бевосита тилга олинмаган бўлса-да, AFP агентлиги бунга жавобан: “Бу, шубҳасиз, Пенсильвания-авеню, 1600 манзилидаги шахсга қарши йўналтирилган сиёсий зарба,” деб изоҳ берди (бу ерда АҚШ Президенти қароргоҳини назарда тутмоқда).

АҚШ Молия вазири Скотт Бессент 6 июль куни маълум қилишича, Вашингтон 1 августдан бошлаб савдо музокараларида ижобий силжиш бўлмаган мамлакатларга божларни қайта жорий қилмоқчи. Бу божлар 2 апрелда Трамп томонидан эълон қилинган эди, аммо кейин кечиктирилган.

Ҳозирча асосий тариф ставкаси 10%ни ташкил этади, бироқ айрим мамлакатлар учун бу бир неча баробар юқори бўлиши мумкин. BRICS аъзоси Хитой билан эса АҚШ ўзаро божларни 120–140% дан 10–30% гача камайтириш бўйича вақтинчалик келишувга эришган.

2024 йил охирида Дональд Трамп BRICS ўз валютасини долларга альтернатива сифатида яратса, ушбу давлатларга 100% бож солиш билан таҳдид қилган эди.

“BRICS халқаро савдода долларни алмаштиришига ҳеч қандай имконият йўқ. Буни қилишга уринган ҳар қандай мамлакат Америка билан хайрлашиши мумкин,” дея огоҳлантирган эди АҚШ Президенти.

Эслатиб ўтамиз, 2022 йилда Россия Президенти Владимир Путин BRICS валюталар саватчаси асосида “халқаро захира валютаси”ни яратиш нияти борлигини билдирган, аммо кейинроқ бу ташаббусга ҳали “мамлакатлар тайёр эмас”лигини тан олган.