Трамп билан музокарага эриша олмаган Зеленский Стармер билан кўришди

north_east

Дунё сиёсатчилари кимни қўлламоқда – Трамп ёки Зеленский?

Кеча, 1 март куни Украина Президенти Владимир Зеленский Лондонга борди ва у ерда Буюк Британия Бош вазири Кир Стармер билан учрашди. Давлат раҳбарларининг музокаралари Даунинг-стритда бўлиб ўтди. Бу ҳақда BBC хабар берди.

Стармер Буюк Британия Украинани тўлиқ қўллаб-қувватлашини билдирди.

“Сизни Буюк Британия тўлиқ қўллаб-қувватлаяпти. Биз Украинани қанча вақт керак бўлса, қўллаб-қувватлаймиз. Умид қиламанки, сизни ва Украинани қўллаб-қувватлаётган одамларнинг олқишларини эшитдингиз”, деди Стармер ўз қароргоҳи олдига урушда қолган мамлакатни қўллаб-қувватловчи плакатлар билан йиғилганларга ишора қилиб.

Британия ҳукумати раҳбари Лондоннинг мақсади Украина учун суверенитет ва хавфсизлик асосида мустаҳкам тинчликка эришиш эканини қўшимча қилди.

Зеленский учрашувдан сўнг ўзининг Telegram саҳифасида пост қолдирди. Унда Стармер билан бўлиб ўтган учрашув “илиқ” кечганини ёзган.

“Музокараларимиз давомида биз бугун Украина ҳамда бутун Европа олдида турган муаммоларни, ҳамкорлар билан мувофиқлаштиришни, Украина позициясини мустаҳкамлаш ва урушни адолатли тинчлик билан тугатиш бўйича аниқ қадамлар, шунингдек, ишончли хавфсизлик кафолатларини муҳокама қилдик”, дея ёзган у.

“Sky News”нинг ёзишича, Украина Молия вазири Сергей Марченко ва Буюк Британия Молия вазири Рэйчел Ривз Украинага 2,26 миллиард фунт стерлинг миқдорида ёрдам кўрсатиш бўйича келишувни имзолаган. Бу маблағлар G7 мамлакатлари ташаббуси билан Украина учун даромадларни фавқулодда тезлаштириш (ERA) дастури доирасида ажратилган. Молия вазирликлари раҳбарлари ўртасида шартномани имзолаш маросими онлайн режимда бўлиб ўтган.

Буюк Британия Бош вазири Кир Стармернинг таклифига биноан бугун, 2 март куни Лондонда Украина бўйича Европа саммити бўлиб ўтади. Унда давлат раҳбарлари, шунингдек, НАТО Бош котиби Марк Рютте, Еврокомиссия раҳбари Урсула фон дер Ляйен ва Европа кенгаши раиси Антониу Кошта иштирок этади. Саммитда томонлар Европанинг Украинани қўллаб-қувватлаш бўйича кейинги ҳаракатлари, шунингдек, мумкин бўлган тинчлик музокараларини муҳокама қилади.

Эслатиб ўтамиз, жорий йилнинг 27 февраль куни Британия Бош вазири Кир Стармер АҚШ Президенти Дональд Трамп билан Оқ уйдаги учрашувда Буюк Британия Украинада тинчликни сақлаш учун қўшин ва самолётлар юборишга тайёрлигини билдирганди.