Стармер Украинага қўшин ва самолёт жўнатишга тайёрлигини билдирди

north_east

Британия Украинага “тинчликпарвар кучлар”ни юборишга чақирди

Буюк Британия Украинада тинчликни сақлаш учун қўшин ва самолётлар юборишга тайёрлигини билдирди. Бу ҳақда Британия Бош вазири Кир Стармер кеча, 27 февраль куни АҚШ Президенти Дональд Трамп билан Оқ уйдаги учрашувда маълум қилди.

“Бу тинчликни сақлашнинг ягона йўли”, дейди у.

Бош вазир Трампнинг тинчликка “чуқур ва шахсий” садоқатини олқишлади.

“Сиз тарихий тинчлик келишувига эришиш учун катта имконият яратдингиз”, деган Стармер.

Трамп Британия Бош вазири билан учрашувни “жуда самарали” деб атади. Унинг сўзларига кўра, у Стармернинг можарога барҳам бериш ҳаракатлари ҳақида маълумот берган ва россиялик мавқедоши Владимир Путин билан “жуда муваффақиятли” бўлган “тарихий телефон қўнғироғи”ни эслатиб ўтган.

“Биз бу урушни тугатиш учун жуда қаттиқ ҳаракат қиляпмиз. Ўйлайманки, биз жуда кўп ютуқларга эришдик ва ишлар жуда тез кетмоқда”, деди Америка етакчиси.

Оқ уй раҳбарининг сўзларига кўра, ўт очишни тўхтатиш тез орада амалга ошиши мумкин.

Америка Президенти тинчликпарвар кучлар ҳамма учун мақбул бўлган форматда жойлаштирилиши кераклигини билдирди. У, шунингдек, Путиндан Украинада Европа тинчликпарвар кучларининг мавжудлиги ҳақида сўраганини ва “бу билан ҳеч қандай муаммоси йўқлигини” айтди.

Эслатиб ўтамиз, аввалроқ “The Times” газетаси агар Россия бунга қаршилик қилмаса, Буюк Британия тинчликпарварлик миссияси доирасида Украина осмонида патруллик қилиш учун Қироллик ҳаво кучларининг Typhoon қирувчиларини юбориши мумкинлиги ҳақида ёзганди. Нашр расмий Лондон учун қуруқликдаги “тинчликпарвар кучлар”га минглаб аскарларни жалб қилишдан кўра, қирувчи самолётларни юбориш осонроқ бўлишини ёзган.