Тошкентда ЙПХдан қочган Malibu ҳайдовчиси ушланди (видео)

Тошкент ҳалқа автомобиль йўлида давлат рақам белгисиз ҳаракатланган, ойналари қорайтирилган Malibu-2 ҳайдовчиси ЙПХ ходимларининг тўхташ талабига бўйсунмай, автомобилни орқага буриб, қочишга уринди. Бу ҳақда Тошкент шаҳар Ички ишлар бош бошқармаси хабар берди.

Маълум бўлишича, автомобиль Учқахрамон томондан Ҳасанбой йўналишида ҳаракатланган. Давлат рақам белгиси бўлмаган Malibu-2’нинг олд ён ойналари қорайтирилгани ва орқа қисмига қўшимча антенна ўрнатилгани ЙПХ ходимларининг эътиборини тортган.

Инспекторлар ҳайдовчига тўхташ ишорасини берган. Бироқ у қонуний талабни бажариш ўрнига автомобилни кескин равишда орқага буриб, ҳаракатини давом эттирган. Кўрилган чоралар натижасида транспорт воситаси тўхтатилиб, ҳайдовчи ушланган.

Ҳолат юзасидан ҳайдовчига нисбатан белгиланган тартибда маъмурий баённома расмийлаштирилган. Malibu-2 вақтинча сақлаш учун жарима майдонига жойлаштирилган.

Мазкур ҳолат акс этган видео ижтимоий тармоқларда тарқалганидан сўнг кўплаб фойдаланувчилар муҳокамаларига сабаб бўлди. Кадрларда воқеа 19 август куни содир бўлгани, давлат рақамисиз ва ойналари қорайтирилган Malibu-2’нинг қарама-қарши йўналишда ҳаракатлангани кўринади. Шунингдек, автомобилнинг орқа қисмида қўшимча антенна борлиги ва унинг инспекторлар автомобили ортидан ҳаракатлангани ҳам акс этган.

Шундан сўнг, ўзини қоидабузар ҳайдовчининг отаси сифатида таништирган шахс видеони тарқатган фойдаланувчилардан бири билан боғланган. У видеони олиб ташлашни сўраган. Тармоқларда тарқалган аудиоёзувда эркак ўғлини ҳайдовчилик ҳуқуқидан маҳрум қилишлари мумкинлигини айтган ва масалани пул билан ҳам ҳал қила олмаётганидан норози бўлган.

Видеони ўчириш талаби рад этилгач, у фойдаланувчига нисбатан ҳақоратли сўзлар ишлатган, унинг олдига бориш билан таҳдид қилган ва босим ўтказишга уринган.

Эслатиб ўтамиз, аввалроқ Андижон шаҳрида йўл-патруль хизмати ходимининг тўхташ ҳақидаги қонуний талабига бўйсунмаган Onix ҳайдовчиси бошқарувни йўқотиб, йўл четидаги дўконга урилгани ҳақида хабар берилган эди.