Тошкентда ўқувчи 4 қаватдан тушиб кетиб, вафот этди

Мактаб-интернат ётоқхонасининг тўртинчи қаватидан тушиб кетиб, оғир жароҳат олган ўқувчи 10 кунлик даволанишдан сўнг вафот этди. Бу ҳақда Бош прокуратура ахборот хизмати раҳбари Ҳаёт Шамсутдинов QALAMPIR.UZ'га маълум қилди.

Билдирилишича, Ш. Ж. исмли ўқувчи бундан 10 кун аввал мактаб-интернат ётоқхонасининг тўртинчи қаватидан тушиб кетган. Оғир жароҳат олган ўқувчи шифохонага ётқизилган ва шундан буён даволаниб келган. Бироқ кеча, 15 сентябрь куни ўқувчи вафот этган.

Қайд этилишича, Ш. Ж. иқтидорли ўқувчилардан бири бўлган. У математика ва илмий йўналишдаги республика ҳамда халқаро танловларда совринли ўринларни эгаллаб келган.

Жумладан, жорий йилда Олмаота шаҳрида ўтказилган ёш тадқиқотчилар халқаро турнирида унинг жамоаси биринчи ўринни эгаллаб, олтин медални қўлга киритган. Шунингдек, у Саъди Сирожиддинов номидаги Республика математика турнирида ҳам совринли ўринлардан бирини эгаллаган.

Маълум қилинишича, мазкур ҳолат юзасидан ҳозирда Олмазор тумани прокуратураси терговга қадар текширув ҳаракатларини олиб бормоқда.