Тошкент кўчаларидан бирига Отатурк номи берилиши мумкин

Тошкент кўчаларидан бирига Туркиянинг биринчи президенти Мустафо Камол Отатурк номи берилиши мумкин. Бу ҳақда бугун, 6 февраль куни Тошкент шаҳар ҳокими Шавкат Умурзоқов ва Туркиянинг Ўзбекистондаги фавқулодда ва мухтор элчиси Олган Бекарнинг учрашуви чоғида маълум қилинди.

Қайд этилишича, Шавкат Умурзоқов ўзбек-турк муносабатлари жадал ривожланаётганини, бу икки давлат раҳбарлари асос солган стратегик ҳамкорлик маҳсули эканини таъкидлаган ҳамда бунда турк дипломатик корпусининг ҳам хизмати беқиёслигини эътироф этган.

Элчи қабул учун миннатдорлик билдириб, унинг Ўзбекистондаги дипломатик миссияси якунига етаётганини маълум қилган ҳамда аввал муҳокама қилинган масалалар – Турк мактабини кенгайтириш, Туркиянинг биринчи президенти Мустафо Камол Отатурк номини Тошкент кўчаларидан бирига бериш ҳамда Тошкент шаҳрида Турк боғини ташкил этиш бўйича ўз мулоҳазаларини билдирган.

Учрашув якунида тарафлар ўзаро мулоқотни давом эттириш ҳамда ҳар икки давлат учун манфаатли ҳамкорликни ривожлантиришга келишиб олган.

Қайд этиш жоиз, 2022 йил март ойида ҳам ўша пайтдаги Тошкент шаҳар ҳокими Жаҳонгир Ортиқхўжаев Олган Бекар билан учрашувида Тошкентда Мустафо Камол Отатурк номидаги кўча пайдо бўлиши масаласини муҳокама қилганди.

Эслатиб ўтамиз, 2021 йил Олган Бекар Туркия Республикасининг Ўзбекистондаги Фавқулодда ва мухтор элчиси лавозимига тайинланганди.