Том Холланд кино тарихидаги энг кўп касса йиғган актёрга айланди

Том Холланд 30 ёшида кино тарихидаги энг кўп касса йиғган актёр бўлди. Бу ҳақда “Variety” хабар берди.

Қайд этилишича, у кинематография тарихида энг кўп касса йиғган актёрлар рўйхатида етакчиликни қўлга киритиб, олдинги рекордчи Зои Салданани ортда қолдирган. Нашрнинг ёзишича, у иштирок этган фильмларнинг умумий касса йиғими тахминан 15,5 миллиард долларга етган, Салданада эса бу кўрсаткич тахминан 15,47 миллиард долларни ташкил этади.

Том Холланд 30 ёшида ушбу рейтингни бошқарган энг ёш актёрга айланган. Актёрнинг чўққига кўтарилишини ҳали ҳам прокатда сотилаётган иккита фильм таъминламоқда: “Ўргимчак одам: Янги кун” фильми 2,4 миллиард доллардан ортиқ маблағ йиғиб, “Аватар” ва “Қасоскорлар: Финал” фильмларидан сўнг кино тарихидаги энг кўп касса йиғган учта картина сирасига кирган. Кристофер Ноланнинг “Одиссея” фильми эса тахминан 1,68 миллиард доллар тўплаб, R рейтингига эга фильмлар орасида тарихдаги энг кўп касса йиғган ва Universal студиясининг энг сердаромад релизига айланган.

“Ўргимчак одам: Янги кун” Том Холланд бош ролини ижро этган Ўргимчак одам ҳақидаги тўртинчи соло фильм бўлдя. Франшизанинг олдинги учта қисмини суратга олган Жон Уоттс ўрнини эгаллаган Дестин Дэниел Креттон картина режиссёри сифатида намоён бўлди. 

Эслатиб ўтамиз, аввалроқ “Ўргимчак одам: Янги кун” фильми прокатнинг илк ҳафтасида АҚШ ва Канадада 355 миллион доллар йиғиб, 2026 йилнинг энг даромадли кинопремьерасига айлангани ҳақида хабар берилган эди.