Такси ҳайдовчисини урган блогер ва унинг опасига жиноят иши қўзғатилди (видео)

Тошкентда такси ҳайдовчиси ва йўловчи аёл ўртасидаги можаро ортидан икки блогер ҳамда улардан бирининг опасига нисбатан жиноят иши қўзғатилди. Бу ҳақда Тошкент шаҳар Ички ишлар бош бошқармаси хабар берди.

Маълум қилинишича, мазкур ҳолат юзасидан блогерлар Минглиев ва Бўтаевга нисбатан Жиноят кодексининг 277-моддаси (Безорилик) 2-қисми “б“ банди билан жиноят иши қўзғатилган.

Ҳайдовчини урган блогер Минглиев суҳбат давомида қилган ишидан пушаймон эканини билдирган.

“Шошилиб, нотўғри иш қилиб қўйдим. Шунинг учун пушаймонман. Кечиринглар мени. Отам, онам, ўзбекистонликлар”, деган у.

Воқеа жойида бўлган яна бир блогер Бўтаевнинг айтишича, у ҳодиса рўй берган жойга келганида такси ҳайдовчиси йўловчи аёлга шилқимлик қилгани ҳақида маълумот олган.

“Мен охирида келганим учун қисқа сўрадим: “Нима бўлди?” дедим. Опасига шилқимлик қилибди дейишгани учун мен шошилиб, мана шу бола шилқим деб бир дақиқалик видео чиқаргандим. 40 дақиқадан кейин ўчириб ташладим, чунки хатойимни тушуниб етгандим. Бироқ аллақачон кеч эди”, деган у.

Блогер тарқатган видеодаги маълумотлар нотўғри бўлганини ҳам тан олган.

“Энг катта хатойим шу видео, мени шахсан ўзимни шошилиб чиқарганим бўлди. Нотўғри маълумот бериб видео чиқарганимдан жуда ҳам пушаймонман. Ўзимга катта дарс бўлди”, деган Бўтаев.

Ҳайдовчи эса можаро йўловчи аёлнинг фарзанди автомобил ҳаракати давомида ўриндиқларни тепиб, унга халақит берганидан кейин бошланганини айтган. Унинг таъкидлашича, у аёлдан болага қарашни сўраганидан кейин йўловчи билан тортишув юзага келган ва у йўловчилардан автомобилдан тушишни талаб қилган. Кейин аёл ўз танишларини чақириш билан қўрқитиб жанжал кўтарган. Шундан сўнг воқеа жойига келган шахслар уни ҳақорат қилган ва калтаклаган.

“Мен 102 га ўзим хабар берганман. Ички ишлар ходими келгунча машинадан тушмаслигимни айтдим. Кейин эшикни очиб тортмоқчи бўлишди. Тушганимдан кейин бири урди, аёл эса телефонимга ташланди. Кейин блогерлар ҳам келиб, юзимга тупурди”, деган ҳайдовчи.

Шунингдек, Минглиевнинг опаси Хусановага нисбатан ҳам Жиноят кодексининг 139-моддаси (Туҳмат) 2-қисми билан жиноят иши қўзғатилган. Ҳозирда мазкур иш бўйича ҳам тергов ҳаракатлари олиб борилмоқда.

Ўзи нима бўлган эди?

Жорий йилнинг 17 август куни Тошкентнинг Яшнобод туманида такси ҳайдовчиси ва йўловчи аёл ўртасида можаро юзага келгани ва можаро вақтида аёлнинг икки таниши бўлган блогерлар ҳам воқеа жойига келиб, ҳайдовчи билан жанжаллашгани ҳақида хабар берилган эди. 

Улар ҳайдовчини ҳақорат қилган ва унга нисбатан куч ишлатган. Оқибатда ҳайдовчи тан жароҳатлари билан шифохонага ётқизилган. Шундан сўнг, ҳайдовчини урган блогер қамоққа олинганди.