Таиландда футболчи чақмоқ уриши оқибатида вафот этди (видео)

Таиланд жанубида ўтказилган футбол учрашуви вақтида чақмоқ уриши оқибатида бир футболчи ҳалок бўлди, яна 9 нафар спортчи жароҳат олди. Бу ҳақда “Bangkok Post” нашри хабар берди.

Ҳодиса жорий йилнинг, 4 август куни Наратхиват провинциясида бўлиб ўтган Golok FA Cup 2026 минтақавий турнири доирасида содир бўлган. Мусобақада Таиланд ва Малайзия жамоалари иштирок этган.

Ижтимоий тармоқларда тарқалган видеода майдонга чақмоқ урилгани ва унинг ортидан бир нечта футболчиларнинг ерга қулаганини кўриш мумкин.

Ҳалок бўлган футболчи 24 ёшли таиландлик Софван Аве экани маълум қилинди. Унинг жамоадошлари майдоннинг ўзида биринчи тиббий ёрдам кўрсатишга уринган, аммо унинг ҳаётини сақлаб қолишнинг иложи бўлмаган.

Чақмоқ уриши оқибатида яна 8 нафар таиландлик футболчи турли даражада жароҳат олиб, шифохонага ётқизилган. Шунингдек, бир нафар малайзиялик футболчи ҳам жароҳат олган. Унга тиббий ёрдам кўрсатилганидан сўнг, уйига жавоб берилган.

Эслатиб ўтамиз, аввалроқ Малайзиянинг Малакка шаҳрида бўлиб ўтган ўртоқлик учрашуви вақтида футболчи Р.Танеш чақмоқ уриши оқибатида вафот этганди.