Таиланд ўзбекистонликлар учун 15 кунлик визасиз режим жорий этиши мумкин

Таиланд ҳукумати Ўзбекистон, Колумбия ва Мексика фуқаролари учун 15 кунлик визасиз кириш тартибини жорий этишни таклиф қилмоқда. Бу ҳақда “The nation” хабар берди.

Маълум қилинишича, тегишли таклиф жорий йилнинг 9 ноябрь куни Виза сиёсати қўмитаси йиғилишида кўриб чиқиш учун тақдим этилади. Ташаббус хорижлик сайёҳлар учун виза расмийлаштириш жараёнидаги кечикишларни бартараф этиш ва узоқ масофадан келувчи туристлар оқимини оширишга қаратилган.

Маълумотларга кўра, виза олишдаги муаммолар, айниқса, Лотин Америкаси давлатларидан келаётган сайёҳларга қийинчилик туғдирмоқда. Масалан, Emirates авиакомпанияси Таиланд туризм идорасига Мексикадан учayotgan йўловчилар визалари ўз вақтида расмийлаштирилмагани сабабли рейсларга келмай қолаётгани юзасидан шикоят қилган. Ҳар бир рейсда 20–30 нафар йўловчи сафарга чиқа олмагани қайд этилган.

Вазирлик раҳбари Сурасак Пханчароенворакул таклиф этилаётган тартиб хавфсизлик ва иқтисодий жиҳатдан баҳоланишини билдирган. Унинг таъкидлашича, хавфсизлик нуқтаи назаридан паст хатарли деб топилган давлатлар фуқаролари учун визасиз кириш имкониятларини кенгайтириш кўзда тутилган.

Қайд этилишича, Ўзбекистон фуқаролари ҳам Таиландга боришда электрон виза расмийлаштириш жараёнида қийинчиликларга дуч келган. Аризалар Россиядаги Таиланд элчихонаси орқали кўриб чиқилгани сабабли жараён мураккаблашган. Бу эса айрим маҳаллий сайёҳлик агентликларини Таиландга мўлжалланган турларни бекор қилиб, мижозларга Вьетнам каби бошқа йўналишларни таклиф этишга ундаган.

Таклиф маъқулланса, Ўзбекистон фуқаролари Таиландга 15 кунгача визасиз бориш имкониятига эга бўлиши мумкин. Ҳозирча бу ташаббус таклиф босқичида бўлиб, визасиз тартиб жорий этилгани ҳақида расмий қарор эълон қилинмаган.

Маълумот учун, Таиланд Қироллиги ҳукумати қарорига мувофиқ, жорий йил 15 сентябрдан бошлаб, Таиландга, жумладан, туристик мақсадларда ташриф буюришни режалаштираётган Ўзбекистон Республикаси фуқаролари мамлакатга боришдан олдин Таиланд электрон визасини расмийлаштиришлари лозим.

Эслатиб ўтамиз, аввалроқ Таиланд Молия вазирлиги мамлакатдан чиқиш учун янги солиқ жорий этиш масаласини кўриб чиқаётгани ҳақида хабар берилган эди. Унга кўра, дастлабки босқичда йиғим миқдори 1 минг батни (қарийб 30 доллар) ташкил этади, шу билан бирга қонуннинг чекланган юқори миқдори 5 минг бат (қарийб 150 доллар) этиб белгиланмоқда. Тўловни Таиланддан учиб кетаётган барча авиайўловчилардан (бир нечта тоифалардан ташқари) ундириш режалаштирилган.