Сурхондарёда қўшмачилик қилган аёл ушланди

Сурхондарёда қўшмачилик билан шуғулланган аёл қўлга олинди. Бу ҳақда “Миллар” хабар берди.

Маълум бўлишича, ушбу аёл 1998 йили Сурхондарё вилояти Шеробод туманида туғилган. Икки нафар фарзанди бўлган аёл Термиз шаҳри “Боғи-Шамол” маҳалласида жойлашган массажхонада раҳбарлик қилиб келган. 

У ўзига юклатилган вазифадан ғаразли ниятларда фойдаланишни режалаштириб, жорий йилнинг 13 февраль куни тунги соат 1:00 да тезкор тадбирга жалб қилинган мижозга массажчи қиз билан ахлоқсиз ҳаракатларни қилиш учун 800 минг сўм эвазига шароит қилиб бермоқчи бўлган пайтда далилий ашёлар билан қўлга олинган.

Мазкур ҳолат жиноят ишлари бўйича Термиз шаҳар судида кўриб чиқилган. Аёл Жиноят кодексининг 131-моддаси (қўшмачилик қилиш ёки фоҳишахона сақлаш) 1-, 2-қисмида назарда тутган жиноятларни содир этганликда айбдор деб топилган. Унга нисбатан суд 1 йил муддатга ахлоқ тузатиш жазоси тайинлаган. Шунингдек, суд Жиноят кодексининг 59-, 61-моддалари тартибида жазоларни қисман қўшиш йўли билан судланувчига 2 йил муддатга озодликдан чеклаш жазоси берган.

Эслатиб ўтамиз, аввалроқ Бухоро вилоятининг Бухоро шаҳрида Telegram’да онлайн фоҳишахона ташкил қилган эркак 100 минг сўм билан қўлга тушгани ҳақида хабар берилганди.