Суперкомпьютер Европа лигаси фаворитини аниқлади

Турнирнинг умумий босқичи якунланганидан сўнг Opta суперкомпьютери Европа лигаси натижалари бўйича ўз башоратларини янгилади. Унда Англиянинг “Астон Вилла” жамоаси турнирнинг асосий фаворити деб қаралмоқда.

Прогнозларга кўра, “Астон Вилла” Европа лигаси кубоги учун асосий даъвогар сифатида кўрилмоқда. Унаи Эмери бошчилигидаги жамоанинг чемпионликни қўлга киритиш эҳтимоли 44 фоизни ташкил этиб, бу кўрсаткич энг яқин таъқибчиларникидан қарийб тўрт баробар юқори.

Рейтингда иккинчи ўринни 10,1 фоизлик имконият билан “Рома” эгаллаган. Учинчи поғонада “Порту” (9,3%) қайд этилган. Кучли бешликни “Лион” (7,5%) ва “Ноттингем Форест” (5,3%) якунлаб берган. Қолган жамоаларнинг ғалаба қозониш эҳтимоли 5 фоиздан паст деб баҳоланган.

Шунингдек, Opta’нинг ТОП-10 башоратлари қаторига “Штутгарт”, “Брага”, “Бетис”, “Фрайбург” ва “Мидтьюлланд” клублари ҳам киритилган. 

Таҳлилчиларнинг таъкидлашича, “Астон Вилла”нинг плей-офф босқичидаги юқори фоиз кўрсаткичи кам учрайдиган ҳолат бўлиб, жамоанинг умумий босқич давомидаги барқарор ўйинини яққол акс эттиради.