Сулҳдан кейин нефть нархи кескин пасайди

Бугун, 8 апрель куни АҚШ Президенти Дональд Трамп Эрон билан 2 ҳафталик тинчлик келишувига эришилганини ҳамда Ҳормуз бўгози қайта очилишини эълон қилган эди. Ушбу сулҳдан сўнг глобал бозорда нефтнинг нархи сезиларли даражада пасайди. Бу ҳақда BBC хабар берди.

Жахон глобал бозорида Brent маркали нефть нархи тахминан 13 фоизга пасайиб, бир баррель учун 94,80 долларни ташкил этдмоқда. Қўшма Штатларнинг ўзида эса бир баррель нефть нархи 15 фоизгача тушиб, 95,75 доллар бўлиб қолмоқда. 

Аммо қора олтиннинг ўртача нархи жорий йил 28 февраль, АҚШ ва Исроилнинг Эронга ҳужум уюштирилганидан буён ҳамон юқорилигича қолмоқда. Уруш бошланишидан олдин ўртача бир баррель нефтнинг нархи 70 доллар атрофида бўлган. Ўшанда Эрон Ҳормуз бўғозидан фойдаланаётган АҚШ ва Исроил кемаларига ҳужум қилиш билан таҳдид қилганидан сўнг Яқин Шарқдан нефть ва газ етказиб бериш бутунлай тўхтаб қолган эди. Бунинг ортидан нафақат Қўшма Штатларда, балки глобал бозорда ҳам нефтнинг нархи кескин ошиб кетган.

Кеча, 7 апрель куни АҚШ Президенти Дональд Трамп Эрон билан икки ҳафталик ўзаро ўт очишни тўхтатиш бўйича сулҳга эришилганини эълон қилди. Америка етакчисининг аниқлик киритишича, ушбу қарор Покистон Бош вазири Шаҳбоз Шарифнинг таклифи ҳамда “Эрон Ислом Республикасининг Ҳормуз бўғозини тўлиқ, зудлик билан ва хавфсиз тарзда очишга тайёрлиги” инобатга олинган ҳолда қабул қилинган. Эрон давлат телевидениесининг хабар беришича, Теҳрон ўт очишни тўхтатиш бўйича 10 та шартни илгари сурган ва АҚШ “уларга рози бўлишга мажбур бўлган”. Улар орасида ҳужум қилмаслик тамойили, Теҳроннинг Ҳормуз бўғози устидан назорати, Эрон ҳудудида уранни бойитиш, асосий ва иккиламчи санкцияларни бекор қилиш, товон пули тўлаш, Америка кучларини минтақадан олиб чиқиб кетиш каби шартлар бор. Шариф Эрон ва АҚШ делегацияларини “барча низоларни ҳал қилиш бўйича якуний келишувга эришиш” учун 10 апрель куни Исломободга музокаралар столига таклиф қилди. CNN телеканали хабарига кўра, Америка делегацияси таркибидан вице-президент Жей Ди Венс, президентнинг махсус элчиси Стив Уиткофф ва Трампнинг куёви Жаред Кушнер ўрин олади.

Ҳожиакбар Муҳаммаджонов