Суд терговчига жазо қўллади

Жорий йилнинг 31 январь куни Жиноят ишлари бўйича Яккасарой туман судининг тегишли қарори билан Ўзбекистон Республикаси Ички ишлар вазирлиги ҳузуридаги Тергов департаменти ўта муҳим ишлар бўйича терговчиси У.Х. жазоланди. QALAMPIR.UZ суд ҳужжати билан танишди.

Аниқланишича, Жиноят кодексининг 168-моддаси (Фирибгарлик) 4-қисми “а” банди ва бошқа моддалари билан очилган жиноят ишида фуқаро У.Ф. 2024 йил 20 августда Жиноят кодексининг 165-моддаси (Товламачилик) 3-қисми “а” банди, 184-моддаси (Солиқлар ёки йиғимларни тўлашдан бўйин товлаш) 3-қисми ва 189-моддаси (Савдо ёки хизмат кўрсатиш қоидаларини бузиш) билан гумон қилинувчи тариқасида иштирок этишга жалб қилинган. У шу куни соат 23:53 да Жиноят-процессуал кодексининг 227-моддаси (Суриштирувчининг, терговчининг ёки прокурорнинг қарорига биноан ушлаб туриш) тартибида ушланган. Эртасига эса гумон қилинувчи У.Ф. айбланувчи тариқасида иштирок этишга жалб қилиниб, унга нисбатан 22 августда “қамоққа олиш” тарзидаги эҳтиёт чораси қўлланилган.

Жорий йил 16 январь куни эса ИИВ ҳузуридаги Тергов департаменти терговчиси У.Х. номаълум сабабларга кўра, дастлабки тергов ҳаракатлари давомида фуқаро У.Ф.нинг ҳуқуқларини ҳимоя қилиб келган адвокат А.А.ни ишда иштирок этишдан четлаштириш тўғрисида асоссиз қарор қабул қилган. 

Адвокат 21 январь куни ушбу қарордан нусха олишни сўраб терговчига  адвокатлик сўрови юборган, бироқ мазкур сўровномага жавоб олмаган. Шундан сўнг адвокат туман судига мурожаат қилиб, ИИВ ҳузуридаги Тергов департаменти ўта муҳим ишлар бўйича терговчиси У.Х.ни Маъмурий жавобгарлик тўғрисидаги кодекснинг 197¹-моддаси (Адвокатнинг профессионал фаолиятига тўсқинлик қилиш) билан маъмурий жавобгарликка тортишни сўраган.

Суд мажлисида адвокат кўрсатма берган, бироқ терговчи тегишли тартибда чақиртирилишига қарамай, номаълум сабабларга кўра суд мажлисига келмаган ва келмаслик сабаблари ҳақида судни огоҳлантирмаган. Шунга кўра, суд ишни унинг иштирокисиз кўриб чиқишни лозим деб топган.

Суд қарори билан адвокатнинг аризаси қаноатлантирилиб, терговчи ҳуқуқбузарлик содир этган деб топилган. Унга базавий ҳисоблаш миқдорининг 2 баравари миқдорида, яъни 750 минг сўм жарима жазоси тайинланган. Жарима давлат фойдасига ундирилиши белгиланган.