Суд Нью-Йорк мэрининг коррупция бўйича ишини ёпди – ОАВ

Нью-Йорк штатининг жанубий округи суди Нью-Йорк мэри Эрик Адамсга нисбатан коррупция ишини ёпди. Бу ҳақда “The New York Post” хабар берди.

Нашр маълумотларига кўра, судья Дейл Хо ишни қайта очиш ҳуқуқисиз тўхтатган. Ўз хулосасида судья суд органларининг айблов томонидан жараённи давом эттиришни талаб қилиш ваколати йўқлигини қайд этган.

Жорий йилнинг февраль ойида АҚШ Адлия вазирлиги бу ишни ёпиш талабини илгари сурганди. Бунга асос сифатида суд жараёни шаҳар ҳокимига АҚШ Президенти Дональд Трамп маъмуриятининг ноқонуний иммиграцияга қарши сиёсатини амалга оширишда халал бераётганини ва Адамснинг сайловолди кампаниясига таъсир кўрсатиши мумкинлигини кўрсатган. Нью-Йорк мэри сайлови 2025 йилнинг ноябрь ойида бўлиб ўтади.

north_east

Ўзбекча чойхона. Нью-Йорк мэри нимада айбланмоқда?

Эслатиб ўтамиз, 2024 йилнинг 26 сентябрида федерал прокуратура Адамсга коррупция иши бўйича айблов эълон қилган эди. Айблов тарафининг баёнотида шаҳар ҳокими пора олгани ва сайловолди кампанияси учун ноқонуний хайрия маблағларини, жумладан, хорижий манбалардан қабул қилгани айтилган. “The New York Times” нашрига кўра, сиёсатчи 2021 йилда Туркия ҳукумати вакилларидан ноқонуний хайрия пуллари олган бўлиши мумкин.

Нью-Йорк мэри ўз айбини тан олмаган ва сайловолди кампанияси АҚШ қонунчилигига тўлиқ мувофиқ ўтганини таъкидлаган.