Тошкентда қизларни алдаб, фоҳишаликка мажбурлаганлар ушланди (видео)

Тошкент шаҳрининг Миробод туманида СПА салон кўринишида фаолият юритган ва одам савдоси билан боғлиқ жиноятларни содир этган гуруҳ фаолиятига чек қўйилди. Бу ҳақда Тошкент шаҳар Ички ишлар бош бошқармаси хабар берди.

Қайд этилишича, Нигина, Раъно ва Зарнигор исмли шахслар ўзаро тил бириктириб, салон ҳудудида ноқонуний фаолиятни йўлга қўйган. Улар ижтимоий тармоқлардаги эълонлар орқали турли иш ваъдалари билан қизларни жалб қилган, бироқ кейинчалик уларни ўз хоҳишига қарши равишда сақлаб, интим хизмат кўрсатишга мажбурлаган.

Жабрланганлардан бирининг айтишича, у Telegram тармоғидаги официантлик ҳақидаги эълон орқали ишга кирган. Бироқ кейинчалик ундан бошқа хизматлар талаб қилинган.

“Буюмларимни олиб қўйишди. Подвалга туширишди. Массаж қилишни билмаслигимни айтдим, ўзимиз ўргатамиз дейишди. Кейин мижозлар билан учрашишга мажбурлашди. Рад этганимизда хонамизга келиб уришарди, сочимиздан тортишарди, баланд пошнали туфлилар билан ҳам уришган пайтлари бўлган. Кўчага ҳайдаб юбориш билан қўрқитишарди”, дея жабрланувчи воқеани сўзлаб берган.

Унинг сўзларига кўра, қизлар қўрқитиш ва зўравонлик орқали ишлашга мажбур қилинган.

“Мен сенга пул тўлаганман, 200 доллар берганман, бошлаймиз дейишарди. Агар айтганини қилмасам, йўлкирасини қайтариб тўлайсан, деб қўрқитишарди. Уришган, сочимдан тортишган. Сени йўқ қилиб юбораман’ деб таҳдид қилишган”, дейди у.

Тезкор тадбир давомида мазкур салонда яна етти нафар қиз массаж хизмати ниқоби остида фоҳишалик билан шуғулланиб келгани аниқланган. Тадбир вақтида гуруҳ аъзолари интим хизмат эвазига 320 АҚШ доллари ҳамда 6 миллион 250 минг сўм олаётган пайтда далилий ашёлар билан ушланган.

Ҳодиса жойидан олинган далиллар белгиланган тартибда расмийлаштирилган.

Мазкур ҳолат юзасидан гумонланувчиларга нисбатан Жиноят кодексининг 135-моддаси (одам савдоси) 2-қисми билан жиноят иши қўзғатилган. Ҳозирда тергов ҳаракатлари давом этмоқда.