Соболенко кетма-кет тўртинчи бор “Australian Open” ярим финалига чиқди

Кеча, 27 январь куни дунёнинг биринчи рақамли ракеткаси, беларуслик Арина Соболенко мавсумдаги илк “Катта дубулға” турнири — Австралия очиқ чемпионатида кетма- кет тўртинчи марта турнирнинг ярим финалига йўл олди. 

Чорак финал баҳсида 27 ёшли Соболенко дунёнинг 27-ракеткаси бўлган, 18 ёшли америкалик Ива Йовични икки сет натижасига кўра 6/3, 6/0 ҳисобида мағлуб этиб, турнирнинг ярим финалига йўл олди.

Финал йўлланмаси учун Соболенко Кори Гауфф (АҚШ) – Элина Свитолина (Украина) жуфтлиги ғолиби билан баҳс олиб боради.

Шу тариқа, Соболенко фаолиятидаги 14-“Катта дубулға” ярим финалига чиқди ҳамда Мельбурнда кетма-кет тўртинчи марта ушбу босқичга етиб келди. Беларуслик теннисчи 2023 ва 2024 йилларда Австралия очиқ чемпионатида ғолиб бўлган, бироқ ўтган мавсумда финалда америкалик Мэдисон Кизга имкониятни бой берган эди.

Маълумот учун, “Australian Open” жорий йилнинг 1 февраль куни якунланади. Турнирнинг умумий мукофот жамғармаси қарийб 75 миллион АҚШ долларини ташкил этади.