Сирдарёда 3 эгизак дунёга келди

Сирдарё вилоятида 3 нафар эгизак чақалоқ туғилди. Бу ҳақда вилоят Соғлиқни сақлаш бошқармаси хабар берди.

Қайд этилишича, Боёвут тумани, "Бунёдкор" маҳалласида яшовчи 2001 йилда туғилган онанинг 3 нафар фарзанди мураккаб операция ўтказиш орқали туғдириб олинган.

"Республика ихтисослаштирилган она ва бола саломатлиги илмий-амалий тиббиёт маркази Сирдарё филиалида 1-тоифали акушер-гинеколог Шаҳло Хўжаева бошчилигида ўтказилган мураккаб операция муваффақиятли якунланди", дейилади хабарда.

Дунёга келган чақалоқлар 2 ўғил, 1 қиз бўлиб, уларнинг вазни қуйидагича:

 1- ўғил бола - 1 кг 920 гр
 2- ўғил бола - 2 кг 710 гр
 3-қиз бола - 2 кг 830 гр

Билдирилишича, она ва чақалоқларнинг аҳволи яхши, улар ҳозирда шифокорлар назоратида.

Эслатиб ўтамиз, ўтган йилнинг август ойида Тошкент вилоятининг Тошкент туманида 23 ёшли аёл 4 нафар эгизакни дунёга келтирганди. Республика перинатал марказида чақалоқларнинг соғлом туғилиши учун барча зарур шарт-шароит ҳозирланиб, кесарча усулида, асоратсиз туғуруқ амалиёти натижасида 1622 граммлик бир нафар ўғил, 1330, 1510 ва 1370 граммлик уч нафар қиз туғилган.

Дилбар Шоакромова