Сербияда 100 мингдан ортиқ киши Президентга қарши митингга чиқди

Кеча, 15 март куни Сербия пойтахти Белград шаҳрида 107 минг киши ҳукуматга қарши бўлиб ўтган митингга чиқди. Бу ҳақда Сербия Ички ишлар вазирлиги хабар берди.

Қайд этилишича, норозилик кўтарганлар орасида талабалар, фермерлар, байкерлар ва мамлакат қуролли кучлари бўлинмалари жамоалари ҳам бор.

“Бу митинг 2024 йил ноябрь ойида норозилик намойишлари бошланганидан бери энг оммавийси бўлди”, дейилади хабарда.

Намойиш маҳаллий вақт билан соат 16:00 да бошланган. Уни талабалар уюшмалари ташкил этиб, намойишчиларнинг бошқа жамоаларини ҳам уларга қўшилишга чақирган. Сербия ҳуқуқ-тартибот идоралари парламент биносидаги митингга 60 мингга яқин одам келишини кутган.

Маълум қилинишича, митинг иштирокчилари мамлакатдаги коррупцияга қарши чиқмоқда ва Президент Александр Вучичдан истеъфога чиқишни талаб қилмоқда. Вучичнинг ўзи норозилик намойишларини ноқонуний деб атаган.

Маълумот учун, Сербияда оммавий митинглар 2024 йил ноябрь ойида Нови-Саддаги вокзалда бетон соябон қулаши оқибатида 15 киши ҳалок бўлганидан кейин бошланган эди. Бундан бироз олдин вокзал реконструкция қилинган эди. Фаоллар фожиада айбдорларни жиноий жавобгарликка тортишни талаб қилган. Сербия Бош вазири Милош Вучевич норозилик намойишлари фонида истеъфога чиққан.

Эслатиб ўтамиз, ўтган йилнинг 22 декабрь куни Сербия пойтахти Белград марказида ўн минглаб одамлар Президент Александр Вучич ва унинг Сербия прогрессив партиясига (SNS) қарши норозилик билдириш учун йиғилганди. Мухолифат етакчилари ва жамоатчилик авария ҳукуматдаги коррупция ва қариндош-уруғчилик сабаб бўлган сифатсиз қурилиш оқибатида юзага келганини айтиб, бир неча бор кўчага чиққан. Намойишчилар “Вучич, ўғри!”, “Қўлларингда қон”, деган ёзувларни кўтариб, шаҳар бўйлаб ҳаракат қилган.