Сербия собиқ президенти Вучичнинг онасига ҳужум қилинди

Сербиянинг собиқ президенти Александр Вучичнинг онаси Ангелина Вучичга бир гуруҳ шахслар ҳужум қилиб, унинг қўлини кесиб юборди. Бу ҳақда “Informer TV” бошловчиси Оливера Милетович маълум қилди.

Унинг айтишича, Ангелина Вучич кеча, 25 октябрь куни Сербияда бўлиб ўтган муддатидан олдинги парламент сайловларида овоз бериб, бозордан қайтаётганида 7–8 кишидан иборат гуруҳ унинг олдига келган. Улардан бири аёлнинг қўлидаги мева-сабзавот солинган сумкани тортиб олган. Бунда унинг қўли кесилган. Милетовичнинг таъкидлашича, Ангелина айнан шу қўлида аввалдан жароҳати борлиги сабабли муаммоларга дуч келган.

Шундан сўнг ҳужумчи унинг юзига яқинлашиб, тишини тишига босган ҳолда ўғлини ҳақорат қилган.

Милетовичнинг сўзларига кўра, Ангелина Вучич бундай воқеа умуман содир бўлиши мумкинлигидан қаттиқ тушкунликка тушган. Бошловчи бу ҳужумни Вучичнинг сиёсий рақиблари томонидан унинг оиласига нисбатан нафрат билан боғлаган.

Ҳукмрон Сербия тараққиёт партияси ҳам воқеа юзасидан баёнот берди. Унда айтилишича, Каленич бозори яқинида блокада тарафдори бўлган сиёсий қарашларга эга бир гуруҳ ёш эркаклар Ангелина Вучични турткилаб, унга бақирган ва бозордан олиб келаётган озиқ-овқат маҳсулотлари солинган пакетларини йиртган.

Партия вакиллари ҳужумни қоралаб, ҳуқуқ-тартибот идораларидан воқеанинг барча тафсилотларини аниқлаш ва унда иштирок этганларни жавобгарликка тортишни талаб қилган. Шунингдек, Ангелина Вучич ҳужум ҳақида полицияга хабар бергани, тегишли идоралар воқеага қонун доирасида баҳо бериши кутилаётгани билдирилган.

Маълумот учун, кеча, 25 октябрь куни Сербияда муддатидан олдин парламент сайловлари бўлиб ўтди. Сайловда қарийб икки йилдан бери ҳукуматга қарши намойишлар ўтказиб келаётган талабалар қўллаб-қувватлаган “Талабалар рўйхати” ва собиқ президент Александр Вучич бошчилигидаги ҳукмрон Сербия тараққиёт партияси ўртасида кураш кечган. Дастлабки натижаларга кўра, талабалар ҳаракати ғалаба қозонганини Вучичнинг ўзи ҳам тан олган.

Эслатиб ўтамиз, жорий йилнинг сентябрь ойида Сербия президенти Александр Вучич иккинчи ва сўнгги беш йиллик президентлик муддати тугашига етти ой қолганида истеъфога чиққан эди.