Дронлар ҳужуми сабаб Москванинг тўртта аэропорти ёпилди

Украина дронлари ҳужуми хавфи сабаб Москванинг тўртта йирик аэропорти 16 октябрдан 17 октябрга ўтар кечаси тун давомида фаолиятини тўхтатди. Внуково, Домодедово, Жуковский ва Шереметьево аэропортларида чекловлар етти соатгача давом этди, 160 дан ортиқ рейс бекор қилинди. Бу ҳақда “Euronews” хабар берди.

Қайд этилишича, Москва мэри Сергей Собянин пойтахт томон учиб келаётган 94 та дрон уриб туширилганини билдирган. Шу кечанинг ўзида Санкт-Петербургдаги Пулково аэропорти ҳам икки марта фаолиятини тўхтатишга мажбур бўлган. Ленинград вилояти губернатори Александр Дрозденко эса ҳудуд осмонида тўртта дрон йўқ қилинганини маълум қилган.

Россиянинг “Агентство” мустақил суриштирув нашри маълумотларига кўра, Москванинг тўртта аэропорти октябрь ойининг дастлабки 14 кунида жами 101 соат ёпиқ бўлган. Бу сентябрь ойининг бутун давридаги 46 соатлик кўрсаткичдан икки баравардан кўпроқ.

Шунингдек, жорий йилнинг 13 октябрь куни Украина Россия пойтахтига қарши энг йирик дрон ҳужумларидан бирини амалга оширгани, бу жараёнда қарийб 500 та дрон ишлатилгани айтилган.

Аввалроқ, 9 октябрь куни Россия Президенти Владимир Путинни олиб кетаётган самолёт Туркманистондаги саммитдан қайтишда дронлар ҳужуми сабаб Москвага қўна олмай, Санкт-Петербургга йўналтирилгани ҳақида хабар берилган эди. Бироқ Россия расмийлари бу маълумотларни тасдиқламаган ҳам, рад этмаган ҳам.

Маълумотларга кўра, Украина Россия аэропортлари фаолиятини издан чиқаришга қаратилган уюшган кампанияни расман тасдиқламаган. Нашрлар бу эҳтимолий операцияни “M&M операцияси” деб атамоқда.

Маълумот учун, Украина Россиянинг ҳарбий, энергетика ва тижорат объектларига зарбалар бериб келмоқда. Бу ҳужумлар Москванинг уруш харажатларини молиялаштириш имкониятларини чеклашга қаратилган.

Эслатиб ўтамиз, аввалроқ Россия 14 октябрга ўтар кечаси ва эрталаб Киевга ракета ва дронлар билан ҳужум қилгани ҳақида хабар берилган эди. Оқибатда 4 киши ҳалок бўлган, 27 киши яраланган.