АҚШ ракеталар етказиб беришни қисқартирди, Россия зарбаларни кучайтириши мумкин – Зеленский

АҚШ Украинага Patriot ҳаво ҳужумидан мудофаа тизимлари учун ракеталар етказиб беришни қисқартиргани сабабли Россия Украинага баллистик ракета ҳужумларини кучайтириши мумкин. Бу ҳақда Украина Президенти Владимир Зеленский Финляндия Бош вазири Петтери Орпо билан учрашув олдидан журналистларга маълум қилди.

“Америкаликлар етказиб беришни қисқартирди, улар (россияликлар) эса баллистик ракета ҳужумларини кучайтиради. Улар нима қилаётгани жуда аниқ”, деган Зеленский.

Унинг билдиришича, Patriot тизимлари учун мўлжалланган, душман ракеталарини ҳавода тутиб қолувчи воситаларни Европа давлатларидан олиш ҳам АҚШнинг розилигига боғлиқ. Яъни, Европа ҳамкорлари бундай ракеталарни Украинага фақат Америка томони рухсат берган тақдирдагина етказиб бера олади.

Зеленскийнинг айтишича, АҚШ тутиб қолувчи ракеталарнинг катта қисмини Яқин Шарққа юборган. Шу сабабли Украина ҳаво ҳужумидан мудофаа тизимлари учун зарур ракеталарни етказиб бериш масаласи янада долзарб бўлиб қолмоқда.

Украина Президенти бу масалада АҚШ билан конструктив мулоқот олиб боришга умид қилаётганини билдирган. Унинг айтишича, музокараларда, хусусан, АҚШ Давлат котиби Марко Рубио билан ҳам ушбу масала муҳокама қилиниши кутилмоқда.

Аввалроқ, Зеленский Европа давлатларида Украина эҳтиёжларини қиш давомида минимал даражада қондириш учун PAC-2 ва PAC-3 туридаги тутиб қолувчи ракеталар етарли миқдорда борлигини айтганди. Бироқ уларни Украинага етказиб бериш имконияти АҚШнинг қарорига ҳам боғлиқ.

Шу билан бирга, Германия Patriot тизимлари учун ракеталар ишлаб чиқарадиган мустақил ишлаб чиқариш линиясини йўлга қўйиш устида ишламоқда. Дастлабки маҳсулотлар 2026 йил охири ёки 2027 йил бошида тайёр бўлиши кутилмоқда. Зеленскийнинг маълум қилишича, Германия билан имзоланган шартномада ушбу ишлаб чиқариш линиясидан Украина учун 600 та ҳаво ҳужумидан мудофаа ракетасини сотиб олиш кўзда тутилган.

Эслатиб ўтамиз, аввалроқ Украинада АҚШда ишлаб чиқарилган Patriot ҳаво ҳужумидан мудофаа тизимлари учун ракеталар тугагани ҳақида хабар берилган эди. Бу эса мамлакатни Россиянинг баллистик ракета ҳужумлари олдида янада заиф ҳолатга солиб қўйган.