Саудия коалицияси Ямандаги ҳусийлар нишонларига зарба берди

Саудия Арабистони бошчилигидаги коалиция кеча, 24 июль куни Яманнинг Ҳудайда вилоятидаги ҳусийларга тегишли ҳарбий объектларга зарба берганини, мазкур объектлар тижорат кемаларига таҳдид солиш учун қўлланилганини билдирди. Бу ҳақда “Reuters” хабар қилди.

Ҳусийлар назоратидаги “Al Masirah TV” телеканали Саудия зарбалари Ҳудайда шаҳридаги давлат телекоммуникация корпорацияси объектларига берилганини хабар қилган. Шунингдек, телеканалга кўра, Саудия кучлари Яманнинг ғарбий соҳили яқинидаги Камаран оролини ҳам нишонга олган.

Ямандаги Саудия бошчилигидаги коалиция матбуот котиби Турки ал-Молики шанба куни тарқатган баёнотда Ҳудайда порти нишонга олинмаганини, Ҳудайда, Рас Исо ва Салиф портлари ҳамон денгиз қатнови учун очиқ экани ва тижорат кемаларини қабул қилаётганини айтган.

Коалиция ўз кемалари ва Саудия Арабистони манфаатларини ҳимоя қилиш учун зарур чораларни кўришда давом этишини, агар ҳусийлар “душманона ҳаракатлар”ни давом эттирса, уларга нисбатан “муросасиз” жавоб қайтарилишини билдирган.

Ямандаги ҳусийлар назоратидаги Ташқи ишлар вазирлиги 24 июль куни бу зарбалар “эскалацияга эскалация билан жавоб бериш” босқичининг бошланиши эканини билдириб, кейинги ҳар қандай воқеалар учун масъулиятни Саудия Арабистони зиммасига юклаган.

Саудия Арабистони 2015 йилда Эрон қўллаб-қувватлайдиган ҳусийлар ҳаракати пойтахтни эгаллаб, халқаро ҳамжамият томонидан тан олинган ҳукуматни ҳокимиятдан четлатганидан сўнг Яманда етти йиллик уруш бошлаган эди. 2022 йилда эришилган сулҳ зўравонлик, очлик ва касалликлар оқибатида юз минглаб инсонлар ҳаётига зомин бўлган можародаги асосий жанговар ҳаракатларнинг катта қисмини тўхтатган.

Бироқ 13 июль куни ҳусийларнинг Саудия аэропортига ҳужум қилиши ҳамда Саудия танкерларига қилинган ҳужумлар орқали амалга оширилаётган денгиз қамалини эълон қилиши ортидан сулҳ издан чиққан. Ҳусийлар аэропортга қилинган ҳужум ўзлари назорат қилаётган аэропортга Саудия берган зарбага жавоб бўлганини, денгиз қамали эса Саудиянинг Яманга нисбатан қамалига қарши жавоб эканини айтган. Саудия Арабистони эса бундай қамал мавжудлигини рад этган.

Шунингдек, Саудиянинг NCC MASA кемаси 24 июль куни Қизил денгиздаги ҳужум оқибатида корпусининг енгил шикастланишига учраган. Бу ҳақда Саудия давлат ахборот агентлиги SPA Транспорт бош бошқармаси манбасига таяниб хабар қилган. Маълум қилинишича, текширувлар кема ва унинг экипажи хавфсизлигини тасдиқлагандан кейин NCC MASA ўз йўналиши бўйлаб ҳаракатни давом эттирган.

Эслатиб ўтамиз, аввалроқ Эрон шу ойда Ислом инқилоби қўриқчилари корпуси (ИИҚҚ) қўмондонлари, ҳарбий маслаҳатчилар ҳамда ракета ва дронларга оид жиҳозларни Яманга ҳаво орқали етказгани айтилганди.