Россиянинг Украинага ҳужумлари оқибатида беш киши ҳалок бўлди (видео)

Россиянинг кеча, 28 июнь куни амалга оширган ҳужумлари оқибатида Украинанинг жануби-шарқий ва шимоли-шарқий ҳудудларида камида беш киши ҳалок бўлди, яна бир неча киши жароҳат олди. Бу ҳақда маҳаллий расмийлар маълум қилди.

Запорожье вилояти губернатори Иван Федоровнинг Telegram орқали маълум қилишича, вилоят маркази Запорожье шаҳрига қилинган зарбалар оқибатида икки киши ҳалок бўлган, яна 16 киши жароҳатланган. Губернатор эълон қилган суратларда ёнғинга учраган бино ва вайрон бўлган турар жойлар акс этган.

Россия билан чегарадош Харков вилоятида эса Змиив шаҳрига ракета зарбаси берилган. Вилоят губернатори Олег Синегубовнинг билдиришича, ҳужум натижасида бир киши ҳалок бўлган, саккиз киши, жумладан икки нафар бола жароҳат олган. Харков вилояти полицияси эса яна бир полиция ходими шимолроқдаги аҳоли пунктларидан бирида фуқароларни эвакуация қилиш ишларини ташкил этаётган вақтда ҳалок бўлганини маълум қилган.

Қайд этилишича, Суми вилоятида ҳам чегарага яқин ҳудудда ҳужум содир этилган. Вилоят раҳбариятининг маълум қилишича, бир нафар кекса аёл ҳалок бўлган. Ҳужумларнинг атайин тинч аҳоли ҳудудига йўналтирилгани ҳақида эса мустақил хабарлар тарқалмаган.

Маълумот учун, Россия ҳам, Украина ҳам тўрт йилдан ортиқ давом этаётган можаро давомида тинч аҳолини атайлаб нишонга олмаганини таъкидлаб келади.

Эслатиб ўтамиз, аввалроқ Россия дронларининг Украинага ҳужуми оқибатида уч киши ҳалок бўлган эди.