Россияда президентлик сайловида овоз бериш бошланди

Россияда президентлик сайлови учун овоз бериш бошланди. Бу ҳақда РИА Новости хабар берди.

Сайлов участкалари аллақачон очилган Камчатка ўлкаси аҳолиси биринчи бўлиб овоз беради. Сайлов участкалари Уралда ва Волга минтақасининг баъзи ҳудудларида ҳам очилди. 15 дан 17 мартгача соат 8:00 дан 20:00 гача сайловда овоз бериш мумкин.

Марказий сайлов комиссияси президентликка тўрт нафар номзодни рўйхатга олди: Николай Харитонов (Коммунистик партия), Леонид Слуцкий (ЛДПР), Владислав Даванков (Янги одамлар) ва Владимир Путин (ўз-ўзини кўрсатган).

Сайлов учун 94 мингдан ортиқ сайлов участкаси, 113,6 миллион дона сайлов бюллетенлари тайёрланди. Шунингдек, агар сайловчи илгари рўйхатдан ўтган бўлса, масофавий электрон овоз бериш тизимидан фойдаланган ҳолда овоз бериши мумкин.

МСК 18 март куни эрталаб овоз беришнинг дастлабки натижаларини эълон қилади. Комиссия биринчи натижаларни 17 март куни соат 21:00 дан бошлаб беришни бошлайди. 

25 февралдан 14 мартгача Президент сайлови учун муддатидан олдин овоз бериш узоқ ва бориш қийин бўлган жойларда, жумладан, қутб станцияларида ва денгиздаги кемаларда бўлиб ўтди. 1 мартдан Россиянинг чет элдаги дипломатик ваколатхоналарида муддатидан олдин овоз бериш имконияти мавжуд. У 144 та давлатдаги 288 та сайлов участкасида бўлиб ўтади.

Маълумот учун, Россия Марказий сайлов комиссияси “Фуқаролар ташаббуси” партиясидан Борис Надеждиннинг президентликка номзодини рўйхатдан ўтказмаган. Бунга уни қўллаб-қувватлаш учун тўпланган имзоларнинг 10 фоиздан ортиғи сохталиги рўкач қилиб келтирилган. Шунингдек, МСК президентликка ўз номзодини эълон қилганида Украинада жанговар ҳаракатлар тўхтатилиши, демократик ислоҳотлар ва сиёсий маҳбусларнинг озод этилиши тарафдори эканини билдирган Екатерина Дунцовага ҳам унинг ҳужжатларида хатолар аниқлангани важи билан номзод бўлишга рухсат бермади. Шундан сўнг Дунцова МСК устидан судга мурожаат қилди. Бироқ Россия Федерацияси Олий суди ҳам ржевлик журналист Екатерина Дунцованинг даъвосини рад этди.

Эслатиб ўтамиз, олдинроқ Россия қамоқхонасида вафот этган мухолифатчи Алексей Навальнийнинг беваси Юлия Навальная Ғарб давлатларини Россияда бўлиб ўтадиган президентлик сайловлари натижаларини тан олмасликка ва Владимир Путинни Россиянинг бешинчи муддатга сайланадиган Президенти сифатида қабул қилмасликка чақирганди.