Tramp Rossiya Eronga harbiy yordam berayotganiga ishonmasligini aytdi

AQSH Prezidenti Donald Tramp Rossiya va Xitoyning Eronga yordam berayotganiga ishonmaydi. Bu haqda Oq uy rahbari Truth Social tarmog‘ida yozib, tanqidchilari va raqiblarining Tehronga qurol-yarog‘, razvedka ma’lumotlari va o‘q-dorilar yetkazib berilayotgani haqidagi sharhlarini ko‘rayotganini bildirdi.

“Agar ular [Rossiya va Xitoy – tahr.] [Eronga – tahr.] yordam berayotgan bo‘lsa ham, bu juda past darajada, lekin men umuman bunga ishonmayman. Ularning yo‘qotadigan narsasi bor, agar shunday bo‘lganida biz bu haqda bilib olgan bo‘lardik, juda tez orada bilardik!” deb yozdi Tramp. 

Eslatib o‘tamiz, iyul oyida Tramp Moskva va Pekinning Tehronga harbiy yordam ko‘rsatilmayotgani haqidagi ishonchli bayonotlariga ishonishini aytgan, ammo agar ular baribir aralashadigan bo‘lsa, “bu ular uchun juda yomon bo‘lishi” haqida ogohlantirgan edi. 

Shu bilan birga, AQSHning Eronga qarshi operatsiyasi eng boshidayoq “The Washington Post” manbalari Rossiya Eronga havo zarbalari uchun nishonlarni tanlashda yordam berib, razvedka ma’lumotlarini uzatayotgani haqida xabar bergan edi. 

Keyinroq, G‘arb razvedka xizmatlari Moskva eronlik harbiylarni AQSH va uning ittifoqchilari Havo hujumidan mudofaa (HHM) tizimlarini yorib o‘tish uchun dronlarni qo‘llashning ilg‘or taktikasiga o‘rgatayotganini, shuningdek, sun’iy yo‘ldosh tasvirlarini taqdim etayotganini aniqlagan. Iyul oyida “Reuters” manbasi AQSH razvedkasi Rossiyaning Eron tomonidan Yaqin Sharqdagi MRB ob’ektlariga berilgan zarbalarga aloqadorligi ehtimolini tekshirayotganini xabar qildi. Shuningdek, “Financial Times” ma’lumotlariga ko‘ra, Moskva Tehronga AQSH harbiy kemalari va mintaqadagi bazalari uchun jiddiy xavf tug‘diradigan qanotli raketalarni ishlab chiqishda yashirincha yordam bermoqda.

Sentyabr oyi oxirida AQSH Eronga qurol-yarog‘ va uni ishlab chiqarish uchun komponentlar sotib olishda yordam bergani uchun 13 ta jismoniy va yuridik shaxsga qarshi sanksiyalar kiritdi. Ular orasida Rossiyaning ikkita kompaniyasi bor: Kaspiy dengizida tashishga ixtisoslashgan “MG-Flot” MCHJ va samolyotlar, vertolyotlar hamda dronlar ishlab chiqaruvchi “A. S. Yakovlev nomidagi Tajriba-konstruktorlik byurosi” AJ.

Oldinroq esa Pekin Eronga zenit-raketa komplekslarini yetkazib berayotgani va Tehron Xitoy yordamida neft sotishga qo‘yilgan sanksiyalarni aylanib o‘tish yo‘llarini topgani haqida ham xabarlar tarqalgan. Tramp Xitoy Xalq Respublikasi Raisi Si Szinpinning sentyabr oyidagi tashrifi chog‘ida uni Islom Respublikasini qo‘llab-quvvatlashdan ogohlantirgan. AQSH Prezidenti Siga Tehronni bevosita yoki bilvosita qo‘llab-quvvatlash “mutlaqo qabul qilib bo‘lmas holat” ekanini aytgan. Bunga javoban Vashington Pekindan tegishli kafolatlar olgan.