Россия ва Украина ўртасида энергетик сулҳ бўйича аниқ келишув йўқ – Кремль

Россия ва Украина ўртасида энергетик сулҳ бўйича келишув ҳозирча аниқ эмас. Бу ҳақда бугун, 14 октябрь куни Россия Президентининг матбуот котиби Дмитрий Песков журналистларнинг Украина инфратузилмасига берилаётган зарбалар давом этаётгани ҳақидаги саволига жавобан маълум қилди.

“Энергетик сулҳнинг доираси қандай белгиланган, бу нимани англатади? Бу йўналишдаги ишлар давом этмоқда”, дейди Песков.

Бугун, 14 октябрь эрталаб Россия Мудофаа вазирлиги Украинага қилинган тунги зарбалар ҳақида ҳисобот берган. Маълум бўлишича, ҳужум давомида мамлакат энергетика инфратузилмасининг еттита объекти нишонга олинган. Киевда Россия ҳарбийларининг нишони Дарница 4-ИЭС ва Киев 5-ИЭС, Киев вилоятида – Киев 6-ИЭС, Триполье ИЕС ва “Киевская” электр подстанцияси бўлган. Харьков ва Харьков вилоятида – Харьков 5-ИЭС ва Змиев ИЭС нишонга олинган. 

Эслатиб ўтамиз, жорий йилнинг 11 октябрь куни АҚШ Президенти Дональд Трамп Россия ва Украина ўртасида энергетик сулҳ ўрнатилаётганини ва ҳар икки томон унга риоя қилишга рози бўлганини маълум қилган эди. Кремль шундан сўнг ушбу масала бўйича мулоқотлар бўлганини тасдиқлади, аммо келишувга эришилган-эришилмагани ва у қайси шартларда эканига аниқлик киритмади.

Украина Президенти Владимир Зеленский учун эса Трамп эълон қилган сулҳ “янгилик бўлган”. Шунга қарамай, Украина етакчиси мамлакат Қуролли кучларига Россия энергетикасига берилаётган зарбаларни тўхтатишни топширган ва Москва ҳам ҳужумлардан воз кечишига умид билдирган. Кейинги уч кун давомида отишмалар давом этганидан сўнг, Зеленский “Россия ҳеч қачон АҚШга нисбатан бунчалик намойишкорона ҳурматсизлик кўрсатмаган эди”, деб баёнот берган.